Ang Trapik sa Manila at mga Karatig-Lunsod…hindi nangangailangan ng “emergency power”

ANG TRAPIK SA MANILA AT MGA KARATIG-LUNSOD

…HINDI NANGANGAILANGAN NG “EMERGENCY POWER”

Ni Apolinario Villalobos

 

Ang isyu tungkol sa trapik ay apektado ng mga bagay na may kinalaman sa KALSADA, PASILIDAD (TRAFFIC LIGHTS, TOWING TRUCKS, CCTV CAMERA, COMMUNICATIONS FACITILITES, ETC.), MOTORISTA, SASAKYAN, AT MGA TAONG NAGPAPATUPAD NG PATAKARAN. Kung isa lang sa mga iyan ang pumalpak, siguradong mala-impiyerno na ang trapik tulad ng nangyayari sa Manila at mga karatig- lunsod nito. Dapat na ituring itong parang isang relo, na kahit isang piyesa lang ang sira, hindi na ito gagana o hindi kaya ay patigil-tigil na ang mga kamay sa pag-ikot. Ang disiplina ng mga motorista ay saklaw na ng pagpapatupad ng mga patakaran, na kung maayos ay siguradong susundin kaya mawawala ang lamangan at palusutan. Apektado din ang trapik ng masamang panahon dahil bumaha lang hanggang bukung-bukong lalo pa at sinabayan ng buhos ng ulan, ay halos ayaw nang umusad ang mga sasakyan.

 

Ang usaping ito ay may kinalaman sa hinihinging “emergency power” ng pangulong Duterte upang mapaayos daw ang trapiko sa Metro Manila na nakakaapekta din sa trapik ng mga karatig-lunsod, at malamang ay para na rin sa iba pang panig ng bansa na may lumalalang trapik. Subalit, kahit may tapang ang presidente sa pagpapatupad at mga ideya na lalong magpapaganda ng kanyang layunin, ang tanong ay: MAAASAHAN BA ANG TALINO AT KAKAYAHAN NG MGA TAONG ITINALAGA NIYA PARA SA GANITONG PROBLEMA?

 

Nakakadismaya na sa loob ng kung ilang beses nang pagkaroon ng Senate sessions tungkol dito, ang pinakamahalagang bagay na hinihingi ng komite ay hindi man lang naibigay ng mga taong itinalaga ng pangulo – ang detalyadong long-range plan, na isang SOP kung may isina-submit na “project proposa”l, na sa ganitong pagkakataon ay ang pagbigay ng emergency power sa pangulo. Bandang huli ay naibigay din kung hindi sila binigyan ng ultimatum. Ang problema sa trapiko ay NAKIKITA. Ang solusyon ay hindi nakukuha sa libro kundi sa mga alituntunin na angkop sa limitasyon ng sitwasyon at kultura ng mga taong maaapektahan. Hindi pwede ang sistema ng Singapore o Germany o Amerika, etc. Iba ang ugali ng mga Pilipino na ang disiplina ay batay sa nakagisnang kultura.

 

Hindi nangangahulugang walang disiplina ang Pilipino. May mga kapabayaan ang gobyerno na lalong pinalala ng kultura na sa tingin ng iba ay kawalan ng disiplina sa panig ng mga Pilipino. Ang ibig kong sabihin, ay halimbawa, ayaw maglakad ng malayo ang mga commuters mula sa isang akyatan/babaan ng mga skywalk o overpass na malayo ang distansiya sa isa’t isa, sa ilalim ng tirik na araw lalo na kung biglang bumuhos ng ulan, dahil ang mga sidewalk ay wala man lang silungan o shade.

 

Paanong maglalakad ng ganoong kalayo ang isang commuter na nakakurbata o babaeng nakapang-damit opisina sa ganoong kalagayan? Kung gagawin nila, siguradong pagdating sa opisina ay umaalingasaw na sila at ang damit ay nakadikit na sa katawan dahil sa pawis. Kung ang iniiwasan ng otoridad ay ang pagsulputan ng mga sidewalk vendors kung magkaroon ng silungan, dapat ay 24/7 na may police visibility na sumisita AGAD kung may mag-attempt na maglagay ng paninda. SUBALIT HINDI NANGYAYARI AT KUNG MAGKAROON MAN AY SA SIMULA LANG. WALANG CONSISTENCY O HINDI TULUY-TULOY.  Isa lang yan sa mga dapat ay isaalang-alang ng mga itinalaga ng bagong pangulo.

 

Nakakatawa pa ang  panukala na paglagay daw ng subways. Hindi yata nila alam na umihi lang ang mga pusa sa Maynila ay nagkakaroon na ng baha (joke lang!). Gusto yata nilang gumastos ang gobyerno para sa isang uri ng malaking drainage sa panahon ng tag-baha. Paanong aasahan ang maayos na maintenance ng subways, ganoong ang nandoon na nga lang sa harap ng Manila City Hall at ang nasa bandang Quiapo ay nagmimistulang lawa kung panahon ng tag-baha? Isa pa, mahina ang maintenance ng mga pasilidad na pampubliko sa Pilipinas, kaya mapapadagdag lang ang subways sa mga mapapabayaan ng ahensiyang itinalaga. Maraming pruweba kung bakit nawalan ng tiwala ang mga Pilipino pagdating sa ganitong bagay, at kasama na diyan ang kapalpakan ng MRT at mga road projects, pati ang mga government buildings na umaalingasaw ang mga comfort room at sirang elevator, lalo na ang airport terminals.

 

Ang lumang-lumang drainage system ng buong Metro Manila ay hindi na maaasahan dahil SINAKAL na ng mga infrastructures na nagsulputan tulad ng mga condo/commercial buildings, at lalong nasakal ang mga LABASAN na hindi kayang alalayan ng mga palyadong pumping stations. Idagdag pa diyan ang mga reclamations na ginawa tulad ng kinaroroonan ng ASEANA CITY sa Paranaque, hanggang sa MOA at Cultural Center areas sa Pasay. Ang mga gilid ng Pasig River sa Maynila ay halos puno na rin ng mga naglalakihang condo/commercial buildings.

 

Ano ang gagawin ng NASASAKAL na daluyan ng tubig mula sa mga siyudad na ORIGINALLY (panahon pa ng mga Amerikano) ay para sa iilang libong kabahayan at commercial establishments lamang, subalit ngayon ay ginagamit ng mga milyon-milyong tao?…resulta: PAG-APAW SA KALSADA NG TUBIG GALING SA KUBETA NG MGA APARTMENT, CONDO, RESTAURANT NA HUMAHALO SA BUMUBUHOS NA ULAN….RESULTA PA:  ANG PAGBAHA NG MGA KALSADA NA DAHILAN NG PAGTATRAPIK! LAKIHAN MAN ANG MGA CULVERTS O MGA TUBONG DALUYAN NG MGA DRAINAGE, WALA PA RING MANGYAYARI DAHIL BUKOD SA “HUMABA” NA ANG DALUYAN DAHIL SA MGA RECLAMATIONS, PAGDATING SA DULO, ANG SEWAGE O MADUMING TUBIG AY SAKAL NA KAYA HIRAP NANG LUMABAS SA DAGAT!

 

Noon, ang mga pulis-trapiko ay hindi takot mabasa sa ulan. Ngayon ang nagtatrapik ay mga “enforcers” ng Metro Manila Development Authority, subalit marami ang nakakapuna na kapag magsimula nang pumatak ang ulan, ang ilan ay nawawala at ang naiiwang nagmamando ng trapik ay mga istambay na “barker”.

 

Palaging EDSA na lang ang tinitingnan ng pamahalaan pagdating sa isyu ng trapik. Para bang wala nang ibang kalsada. At, kung maglunsad naman sila ng operasyon upang “linisin” ang mga alternate streets, ay hind rin consistent….parang pagana-gana lang o di kaya ay kung marinig nilang magmura ang pangulo. Halimbawa dito ay noong unang umupo ang pangulo. Dahil sa takot na mapagdiskitahan, biglang kumilos ang LTO at LTFRB ng kung ilang araw din upang magtanggal ng mga illegally parked na mga sasakyan kuno sa mga tabi ng kalsada….napansin ko pa na 7AM pa lang ay kumilos na sila upang ma-tow ang mga sasakyan. Subalit ngayon, balik na naman sa dati ang kalagayan ng mga nagsisikipang kalsada na ang iba ay mayroon pang mga repair shop at basketball court! In fairness naman sa Divisoria area, ang kahabaan ng Recto mula sa Sta. Cruz hanggang Divisoria ay hindi nawawalan ng mga pulis kaya nawala ang mga vendors na sumakop na ng kalsada.

 

Ang nakakaligtaan ng gobyerno ay ang aspeto sa pagkontrol ng pagdami ng mga bagong sasakyan. Ito ang dapat na pagtuunan ng pansin dahil sa kamurahan ng animo ay mga disposable na mga sasakyan, maski janitor sa opisina ay may kakakayahan nang bumili ng hulugan basta may 20k pesos na pang-down payment lang. Kahit pa padaanin ang mga sasakyan sa mga exclusive subdivisions kung sakali, pero hindi pa rin pipigilan ang pagdami ng mga sasakyan taun-taon ay wala ring mangyayari sa mga plano na siguradong kokopyahin sa sistema ng ibang bansa. (Sa Singapore, bawal ang mga kending may pagka-bubble gum at may minimum na pasahero ang mga pribadong papasok sa lunsod…. kaya ba yang ipatupad sa Maynila?)

 

HINDI KAILANGAN ANG EMERGENCY POWER PARA MASOLUSYUNAN ANG PROBLEMA SA TRAPIKO sa aking pananaw. ANG KAILANGAN AY “CONSISTENCY” SA PAGPAPATUPAD NG MGA BATAS,  MGA “MATATALINONG” PANUKALA at “MATATALINO” ring mga tao na gagawa ng mga ito, na ang TALINO ay hindi halaw sa mga libro kundi sa nakikita nilang AKTWAL na sitwasyon ng mga kalsada at ugali ng mga gumagamit!

 

Kung may “emergency power” siguradong hindi na mag-iisip ng ibang paraan ang mga taong itinalaga ng pangulo, kundi umasa na lang sa pinakamadaling nakasaad sa hinihinging kapangyarihang yan…na sana ay hindi ibigay ng senado. Ang kawawa dito ay ang pangulo dahil siya ang ituturo ng mga nasa ibaba niyang hindi niya nababantayan 24/7, kahit palpak ang kanilang ginagawa dahil ang sinasabi niya palagi ay aasa lamang siya sa resulta ng mga pagpapatupad. Tanggalin man niya ang mga pumalpak na nagpatupad, sira na ang kanyang programa at imahe!

Ang Inter-modal Terminal

ANG INTER-MODAL TERMINAL

Ni Apolinario Villalobos

 

 

Sa pagkakaunawa ko kapag sinabing “mode of transportation” ang ibig sabihin ay “uri ng sasakyan” ….maaaring jeep, bus, trak, tren, traysikad, tricycle, kotse, taksi, o aircon public van. Kaya kapag sinabing “inter-modal”, ito ay may kinalaman sa iba’t ibang uri ng sasakyan na nagpapasahan at nagsasaluhan ng mga pasahero.  At, ang “inter-modal” terminal kung para sa kapakanan ng mga pasahero, dapat ito ay kinapapalooban ng mga paradahan ng mga sasakyan na pagpipilian ng mga pasahero upang sakyan patungo sa kanilang destinasyon pagbaba sa bus o ano pa mang uri ng sasakyan galing sa probinsiya.

 

Halimbawa, kung ako ay galing sa Cavite, pagdating ko sa inter-modal terminal, dapat ay mayroon akong malilipatang sasakyan papunta sa Ayala, Cubao Baclaran, o Quiapo. Ibig sabihin ay hindi ko na kailangang maglakad ng ilang daang metro upang makarating sa hagdanan ng  overpass o skywalk para tumawid sa kabilang panig ng kalsada, maglakad uli ng ilang daang metro upang makarating sa jeepney stop o bus stop para sumakay na naman papunta sa Ayala, Cubao, Baclaran, o Quiapo. Kung ayaw kong gawin yon ay mapipilitan akong sumakay sa taksing nakapila sa loob ng “inter-modal” terminal, pero para aking hirap sa pera ay malaking epekto sa budget. Paano kung kasagsagan ng ulan?….kapag tanghali na tirik ang araw kaya nakakapaso ang init?

 

Ang sitwasyong nabanggit ang dapat na isaalang-alang ng mga taong itinalaga ng bagong presidente upang masolusyunan ang trapiko sa Metro Manila, hindi ang paghukay ng mga kalsada upang gumawa ng subway na magiging underground river lang tuwing panahon ng baha o di kaya ay maglagay ng mga “hanging stations” para sa cable cars na magdudulot lang ng kapahamakan sa mga pasahero dahil sa inaasahang mababang uri ng maintenance na nararanasan na tulad ng sa MRT at airport terminals!

 

Ang dapat planuhin ng mga taong itinalaga ni presidente Duterte ay mga infra-structure na angkop sa kalagayan ng Pilipinas at kultura ng Pilipino….HUWAG MANGGAYA SA IBANG BANSA.

 

Ang Emergency Power para sa Trapik

ANG EMERGENCY POWER PARA SA TRAPIK

Ni Apolinario Villalobos

 

Nakita na ng gobyerno ang pag-imbudo ng mga sasakyan sa EDSA, Roxas Boulevard, Commonwealth Avenue, at iba pang pangunahing kalsada ng Metro Manila na nagpapakitang mas marami ang mga pribadong sasakyan kaysa pang-publiko. Ilang beses nang napuna ang kamurahan ng mga kotse kaya kahit ang mga nagbi-bedspace lang sa boarding house ay nakakaya ang pagbili….ibig sabihin ay kahit wala silang garahe. Ano ang nangyari sa panukalang taasan ang buwis na ipapataw sa mga sasakyan?

 

Kung tatanggalin ang mga kolorum na pang-publikong sasakyan sa kalsada, mga commuters naman ang kawawa. Ilang beses nang nagkaroon ng “operation” ang LTFRB at LTO upang mahuli ang mga sasakyang kolorum,  na naging sanhi naman ng ng pagka-stranded ng mga commuters. Nangangahulugan ito na ang kailangan ay matinong mass transit system, na kung maaari ay hindi tulad ng maya’t mayang nasisira na MRT. Umamin din ang PNR na wala silang budget para sa mga bagong bagon o tren. Bakit hindi ito aksiyunan agad ng gobyerno?

 

Napansin ko na pagkalipas ng peak hours ng trapik na hanggang 9:00AM ay halos wala na ring laman ang mga bus, LRT at MRT. Bakit hindi ipatupad ang matagal nang pinapanukalang “staggered working hours” upang hindi nagkakasabayan ang mga commuters sa pagsakay sa mga public transports kung papasok  sa umaga at pag-uwi sa hapon,  mula 6:00 AM hanggang 9:00AM, at sa hapon naman ay 4:00PM hanggang 7:00PM? At, ano rin ang nangyari sa 4 or 5-day/ work week upang makatipid din sa kuryente?

 

Ang nandiyan nang common terminal ng mga south-bound bus sa dating Coastal Mall sa kanto ng Roxas Boulevard at Coastal Road ay napapabayaan. Ang pinagyayabang noong aircon waiting lounge na may TV sets pa ay hindi pinapagamit. Ang TV set sa  nagagamit na non-aircon lounge ay matagal na ring hindi gumagana. Marumi rin ang paligid ng terminal, maraming basura at maputik. Ito ay nasa ilalim ng pamamahala ng MMDA. Bakit hindi ayusin muna para maipakita sa mga commuters na talagang tapat sa kanilang layunin ang mga ahensiyang may kinalaman sa trapik?

 

Ang tanong ay kung bakit hindi nakumbinsi ang Senate Committee tungkol sa trapik na pinamumunuan ni Senator Poe ganoong malinaw ang mga pangangailangan. Ang sinasabi ng komite ay wala silang makitang “projects” na paggagamitan ng emergency powers. Baka nagkaroon ng problema sa pagpresenta ng mga layunin ng emergency power….mga taong nagpresenta kaya ang may diperensiya dahil walang kakayanang magkumbinse? Talaga bang competent sila?

 

Hindi sagot sa trapik ang point-to-point na mga bus sa kalsada na proyekto ng DOTC, dahil bukod sa mahal ang pamasahe ay pandagdag lang sila sa dami ng mga bus sa EDSA. Pang-engganyo daw ito maski sa mga may kotse upang huwag gumamit nito papunta halimbawa sa Makati, dahil igagarahe pagdating sa bahagi ng Maynila kung saan ay merong terminal ng point-to-point bus. Ganyan din ang layunin ng LRT at MRT, subalit ang problema naman ay ang pagka-inutil ng train system na ito dahil palaging sira. At isa pang tanong ay kung gaano kadami ang mga ligtas na paid garage o parking lot sa buong Metro Manila.

 

Ang banat naman ng mga organisasyon ng mga jeep ay kawalan ng mga opisyal na itinalagang mga loading at unloading areas. Sa ibang bahagi ng Maynila ay palipat-lipat pa ang mga “stops” dahil walang permanenteng marking. Ang hindi matanggap ng mga opisyal ng mga organisasyong ito ay ang talagang kawalan ng disiplina ng mga driver na kasapi nila na nakadagdag sa kawalan rin ng disiplina ng mga bus drivers!

 

Ang mga pansarili kong agam-agam tungkol sa emergency power ay:

• Huwag sanang gamitin sa pagpapagawa ng subway dahil bahain ang Metro Manila.
• Huwag sanang gamitin sa pagpagawa ng cable cars dahil hindi naman bulubundukin ang Metro Manila. Paano kung nagka-aberya sa ere dahil sa inutil na pagkagawa na pinagkitaan lang? Ganyan ang sitwasyon ng MRT na palaging sira!

 

Sabihin na nating hindi corrupt ang presidente dahil napatunayan na, paano ang mga itinalaga niya? Kaya, tama lang ang senado na i-obliga ang mga ahensiya na magsumite ng talagang detalyadong dokumento upang malaman ng mga Pilipino kung tama ang paggamit ng pera ng bayan.

 

 

Waiting Sheds should be Where Bus and Jeepney Stops Are

WAITING SHEDS SHOULD BE WHERE BUS

AND JEEPNEY STOPS ARE

By Apolinario Villalobos

 

 

The Metro Manila Development Authority, in the case of Metro Manila, and the local government units should check the location of the waiting sheds distributed along highways and secondary thoroughfares. Historically, the waiting sheds as projects do not have a good reputation as their construction have been subject to a corrupt issue, in particular, the “commission”. Many sheds were allegedly sporadically distributed without due planning. As a result, today, there are many sheds that are awkwardly located because they are situated far from the designated bus and jeepney stops. Who would want then, to wait for a bus or jeepney at a designated stop under the rain or scorching heat of the sun?

 

During the past administrations, the waiting sheds as with the basketball courts, Multi-purpose and Reading Centers were the favorite sources of commission amassed by corrupt officials. There was a scramble for budget supposedly intended for the mentioned projects. For this reason, there are lengths of streets dotted with unnecessary waiting sheds which later on were just used by street dwellers. In this regard, many basketball courts and multi-purpose centers were also alleged to have been overpriced and built with inferior materials.

 

The authorities are eternally facing a problem as regards the discipline of commuters and drivers of public conveyances. The commuters cannot be stopped from waiting for their ride where waiting sheds are located, but which are far from designated stops. The traffic enforcers are pitifully doing their best to drive commuters to these designated stops…a futile effort, when all the while, the solution is remove the old waiting sheds and build new ones where the bus and jeepney stops are located!

Walang Silbi ang Special Lanes sa Manila

Walang Silbi ang Special Lanes sa Manila

Ni Apolinario Villalobos

 

Hindi na naman nag-isip ang mga ahensiya na naglunsad ng “road sharing project” sa Commonwealth Avenue sa Quezon City. Masabi lang na may inilunsad na proyekto na pampapogi ay sige na lang sila nang sige para makakuha ng media exposure. Sa paglunsad ng proyekto, may inilagay silang mga plastic barrier para ipakita ang bahagi ng highway na inilaan sa mga nagbibisikleta, nag-posing ang mga matatakaw sa kodakan na mga opisyal, at kinabukasan, wala na ang mga plastic barrier kaya balik na naman sa dating pagmamanehong pabara-bara ang mga walang disiplinang motorista – nawala na ang bahagi para sa mga nagbibisekleta!

 

Mismong mga grupo ng mga nagbibisekleta ay hindi gusto ang paglaan ng bicycle lane sa gitna ng kalsada dahil alam nilang hindi rin ito rerespetuhin ng mga motorista kaya malalagay lang sa alanganin ang buhay nila. Ang gusto nila ay isang bahagi sa labas ng kalsada – kung hindi man makipag-share sa pedestrian lane, ay isang hiwalay na lane pero katabi lang din ng pedestrian lane.

 

Kung ang yellow lane nga lang para sa mga bus ay binabale-wala dahil mismong mga bus ay lumalabas dito at ito ay pinapasukan din ng mga kotse…. paano pang aasahan ang pakikipag-“share” ng main road sa mga nagbibisekleta? Ang kasukdulan ng kawalan ng disiplina ng mga motorista sa Maynila ay ang pag-alis nila kung minsan ng mga plastic barrier na inilalagay ng MMDA upang mapaayos ang daloy ng trapiko. Pakirimdam ng karamihan ng mga motorista sa Maynila ay pagmamay-ari nila ang mga kalsada kaya ang pag-aagawan ay humahantong kung minsan sa paluan ng tubong bakal at barilan. Dahil diyan, hindi nakapagtataka kung ang ibang mga drayber ng dyip at bus ay mgay baon na tubong bakal at ang mga pribadong motorista naman ay may baon namang baril bilang proteksiyon daw.

 

Naglagay din ng mga “yellow boxes” sa mga intersection ng malalaking kalsada subalit hindi rin ito nirerespeto ng mga motorista. Sa labas ng box na ito dapat huminto ang mga motorista at ang abutin ng pagtigil o “stop” sa loob, ay dapat may penalty, subalit wala ring nangyari sa patakarang ito dahil hindi sinusunod. Marami pa rin ang humahabol sa pagpalit ng kulay ng traffic lights. Sa gabi naman kung kaylan ay wala nang mga traffic enforcer, kanya-kanya din ng diskarte ang mga motrista na hindi sumusunod sa traffic lights.

 

Hindi dapat isisi lang sa dami ng mga sasakyan ang mala-impiyernong trapik sa Maynila. Kung may disiplina lang ang lahat ng motorista, maiiwasan sana ang PAGKABUHUL-BUHOL (entanglement) ng trapiko. Maganda na sanang kahit mabagal ay tuloy lang ang pag-usad ng mga sasakyan kaysa naman tumigil dahil may mga motoristang hindi nagbigayan kaya nagkaroon ng BUHOL ang trapiko, lalo na kung ito ay nagreresulta sa banggaan!

Ang Trapik ay Nasa Ibabaw ng mga Tunay na Problema

Ang Trapik ay Nasa Ibabaw ng mga Tunay na Problema

Ni Apolinario Villalobos

 

Ang isyu ng problema sa trapik sa malalaking lunsod ng Pilipinas lalo na sa Manila ay yong sinasabi sa Ingles na “scum” o “froth”. Kung ihahalintulad sa hindi dumadaloy na tubig sa estero, ito yong mga animo ay bumubulang nakapaibabaw sa maruming tubig, at kung sa serbesa naman ay yong lumutang na bula pagkatapos ibuhos sa baso. At, dahil lumulutang agad ay unang nakikita. Ganyan din ang trapik na nakikitang problema sa mga kalsada ng mga lunsod. Subalit, ang katotohanan ay hindi ito mangyayari kung walang problema sa bandang “ilalim” ng sitwasyon. Ang mga sumusunod ay naisipan ko lang na baka mga problema:

 

• Kaluwagan sa pagbili ng mga bagong sasakyan dahil nagkakamurahan ng presyo….at, hindi kinokontrol ng gobyerno. Kung kontrolin naman ay sasabihin ng mga apektado na laban ito sa karapatan ng isang malayang Pilipino. Ang kagustuhan ng karamihan na bumili ng sasakyan ay bunsod ng kultura ng Pilipino na may kinalaman sa kayabangan. Kahit nangungupahan lang ng kuwarto ang pamilya, halimbawa, ng isang simpleng empleyado ay gusto pa rin ng padre de pamilya na magkaroon ng sasakyan para may pangporma at magamit sa pamamasyal sa Luneta ang pamilya.

 

Para sa mga taong ito, hindi bale nang panay ang utang sa Bombay at halos walang pamasahe sa pagpasok sa trabaho o di kaya ay alaga ng pagmumura ng may-ari ng kuwartong inuupahan dahil sa naaantalang pagbayad ng upa, basta may kotse lang na naidi-display upag kaiinggitan ng mga kapitbahay, kahit walang garahe. Nag-operasyon noon upang mag-tow ng mga sasakyang nakaparada sa tabi ng kalsada, subalit “ningas-cogon” naman dahil makalipas ang ilang araw ay itinigil na.

 

• Pagpapabaya ng mga mambabatas sa paggawa ng mga batas na may “pangil” at makatotohanan. At, pagpapabaya rin ng mga ahensiyang dapat magpatupad sa mga batas na naipasa na. Hindi rin isinasaalang-alang ang pagtalaga ng karampatang budget sa mga naipasa nang mga batas upang hindi magamit na dahilan ang kawalan nito kaya walang mga gamit at mga karagdagang tauhan, na kadalasang dahilan ng pagtuturuan ng mga mambabatas at mga ahensiya.

 

• Ang mabagal o makupad sa pagpapatupad ng mga proyekto tulad ng mga kalsada sa lunsod at highway sa probinsiya. At, kung nagawa na, ang mga ito ay palpak kaya madalas ang pagpapaayos agad…halatang gusto lang talagang pagkitaan ng mga tiwaling opisyal at ahensiya. Nagreresulta tuloy ito sa pagdurusa ng mga motorista at commuters …pagdurusang nagsisimula sa paggawa ng mga proyekto hanggang sa pagpapa-repair ng mga ito…samantalang ang mga kurakot ay masaya!

 

• Ang hindi pagbibigayan ng mga motorista dahil ayaw ng bawa’t isang malamangan. Dahil sa ugaling ito ng mga Pilipinong motorista, yong traffic sign na “Yield” ay walang silbi sa Pilipinas.

 

Sa madaling salita, kaya matindi ang trapik sa Pilipinas ay dahil walang disiplina ang mga motorista, maraming butas ang mga batas na ginawa ng mga tiwaling mambatatas kaya pinagkakaperahan ng mga tiwaling taong dapat magpatupad sa mga ito, at hindi kontrolado ang pagpasok ng mga bagong sasakyan na umaapaw sa mga kalsadang hindi nadugtungan at naluwangan. At, sa mga dahilang yan…nagbubulag-bulagan ang mga nakaupong tiwali na ay kawatan pang pinagkatiwalaan ng taong bayan!