Ang Abogado

ANG ABOGADO

Ni Apolinario Villalobos

 

 

Ang todo-todong denial ni de Lima ay typical na ugali ng isang abogado. Ang tagumpay ng isang abogado sa korte ay depende sa kanyang galing sa pagsalita at pagpakita ng “ebidensiya”…at diyan yumaman ang ILANG abogado na kinukuha ng mga drug lord at kriminal na mayaman. Dapat ding tanggaping hindi lahat ng batas ay patas sa mayaman at mahirap. Ang ILANG mga gumawa kasi ng mga batas ay mayayaman at kaya nga sila nagpursigeng maging mambabatas ay upang masiguro na lalo pa silang makinabang. Ang ILANG mambabatas na hindi mayaman ay may balak namang yumaman…huwag silang mambola sa pagsabi na kaya sila pumasok sa pulitika ay gusto nilang tumulong sa taong bayan. Wala ring silbi ang sinasabing “hustisya” sa korte dahil mismong ILAN sa mga huwes ay tiwali.

 

Kung magaling ang abogado, kahit mali ay napapalabas niyang tama batay sa batas na ginawa ng mga mambabatas na karamihan ay abogado rin. Sigurado rin ang panalo niya kung ang kalaban niyang abogado ay walang binatbat o walang kuwenta…at lalung-lao na kung ang huwes na humahawak sa kaso ay binayaran. Dahil sa mga nabanggit ay may kasalanang “miscarriage of justice” kung sakaling mapatunayan ng “matinong” nakakataas na huwes ang nangyaring katiwalian, batay naman saa tinatawag na “appeal”.  Sa larangan ng abogasya ay matunog ang mga bupete o law offices na nakapagpanalo ng mga kriminal kahit obvious na may kasalanan, pero dahil magaling sa pagsilip ng mga batas na may butas ang mga abogado nila, sila ang kinukuha ng mga korap sa gobyerno, mga holdaper na mayaman at drug lords.

 

May mga kaibigan akong abogado na kahit hindi angkop ang utak sa abogasya ay nagpilit kumuha ng kursong ito dahil pinagbigyan lang ang magulang. Ang iba naman ay balak lang mag-notaryo at hindi hahawak ng kaso na pagdedebatihan sa korte dahil tanggap naman nila na mahina sila sa Ingles lalo na sa pagsalita nito. Ang dalawa nga sa kanila ay nagpapa-edit pa sa akin ng mga dokumentong ginawa nila.

 

Ang mga batas ay hindi perpekto dahil kahit kapirasong butas ay meron sila at ito ang mga pinag-aaralan ng mga abogado. Dahil diyan ay maraming tiwaling mambabatas na abogado dahil alam nila kung anong batas ang pwede nilang pagkitaan, at ang iba ay sila pa ang nagpanukala.

 

Balik kay de Lima…..ang pagmamatigas niya ay effort at karapatan ng mga “matataling tao”, batay sa mga kasabihang, “my word or your word” at, “innocent until proven guilty”. Siya ay edukada at abogada, pero ang mga witnesses laban sa kanya ay hindi nakatapos ng kurso, at yong isa nga ay hindi nakatapos ng elementarya.

 

Ang blog na ito ay pansarili kong pananaw at hindi akong nanghihikayat ng mga mambabasa upang ako ay paniwalaan o di kaya ay mawalan ng tiwala sa korte at mga abogado. Hindi naman lahat ng abogado ay may matuwid na pag-iisip at konsiyensiya….masuwerte ang makakakuha sa kanila.

Tao Pa rin ang Magdadala Para sa Kaayusan ng Bansa…hindi batas

Tao Pa rin ang Magdadala

Para sa Kaayusan ng Bansa…hindi batas

Ni Apolinario Villalobos

Maski may magagandang batas ang Pilipinas, kung hindi ito naipatutupad ng maayos ng mga dapat magpatupad, ang mga ito ay mawawalan rin ng silbi. Kaya lumalabas na ang tao pa rin na may maayos na takbo ng isip at magandang ugali ang kailangan. Sa buong mundo, bukod tanging Pilipinas ang may pinakamarami at pinakamagandang mga batas na naipasa. Sa kasamaang palad, hanggang papel lamang ang mga ito. Sa mga hindi naipatutupad, ay idinadahilan ang kawalan ng budget para sa support facilities. Sa mga naipatutupad, hindi naman maayos ang pagsasagawa dahil sa umiiral na corruption.

Walang batas na hindi nakikitaan ng butas na nasisilip ng mga corrupt na tagapagpatupad upang pagkitaan nila. Halos lahat ng batas ay napapaikutan ng mga tiwaling opisyal ng gobyerno. Ang mga mambabatas namang tiwali ay sinisiguro na may pakinabang sila sa mga batas na ipinapasa nila….sinisiguro nila na may mga probisyong maaari nilang paikutan upang kumita, at kung hindi man sila ay ang mga kaalyado na gagamit ng mga batas na ito.

Halimbawa na lamang ay ang mga batas para sa mga infra-structure project ng gobyerno na kung hindi dahil sa anomalyang kinasangkutan ng mga Binay ay hindi nabistong marami palang butas. Ang mga batas sa pagpapatupad ng mga proyekto sa pamamagitan ng non-government organizations (NGO) ay ganoon din, kaya lumitaw din ang eskandalo ng mga ghost NGO at proyekto ni Napoles.

Ang mga batas sa recruitment ng mga pulis ay nakitaan din ng mga butas kaya nahaluan ng mga tiwaling bagong pulis ang hanay ng kapulisang matino. Ang mga pamimili ng gamit para sa mga ahensiya, lalong nakitaan ng maraming butas kaya hindi maaaring walang kumita dahil sa malalaking patong.

Sa isang banda, kahit may mga diperensiya sana ang mga batas na pinatutupad, hindi pa rin magiging dahilan ang mga ito upang pumalpak ang pagpapatakbo ng gobyerno kung matino ang mga opisyal na nagpapatupad. Maaayos naman sana ang makikitang diperensiya, sa tulong ng mga imbestigasyon para sa ikabubuti ng mga batas na naipasa na, o yong sa Ingles ay “investigation in aid of legislation”. Subalit hinihintay pang may mga kumita o nangurakot at nagkabistuhan bago gawin ang mga imbestigasyon. Dahil “reactive” at hindi “preventive” ang uri ng gobyerno, patung-patong na mga pinsala ang hinahayaang mangyari muna bago kumilos ang mga kinauukulan upang “mag-imbistiga”.

Para sa mga kagawarang nakitaan ng katiwalian, hindi sapat ang pagpapasa ng mga bagong batas o pagbabago ng mga palpak na umiiral nang batas upang mapatino ang mga ito. Sa bandang huli, kahit pakialaman pa ng Diyos ang paggawa ng mga batas kung isip kriminal at kurakot ang mga magpapatupad ng mga ito, parang wala ring batas na sinusunod, kaya walang mangyayari…at magugulo pa rin ang pagpapatakbo ng gobyerno!…yan ang umiiral sa kawawang bayan ng mga Pilipino!

Sa personal kong pananaw, dahil tao ang may diperensiya sa maayos na pagpapatupad ng mga batas, ang dahilan ay nasa pagkatao niya makikita….ang kanyang kasakiman! Hangga’t umiiral ang kasakiman ng tao, patuloy na magiging miserable ang buhay sa mundo!