Hayaan natin ang mga Kababayang Iba ang Relihiyon

Hayaan natin ang mga Kababayang Iba ang Relihiyon

Ni Apolinario Villalobos

Maselang usapin ang relihiyon, personal itong bagay, may pagka-ispiritwal at may kinalaman sa pagkatao. Wala tayong karapatang manglait ng ibang relihiyon na sa tingin natin ay pangit ang  sistema dahil naiiba sa atin. Ang hindi natin alam, baka ganoon din ang tingin ng ibang tao sa relihiyon natin. Hindi kayang pangibabawan ng anumang uri ng simbahan o relihiyon ang likas nang nakaukit sa pusong pagmamahal sa Diyos na pinaniniwalaan ng bawa’t isa, ganoon din ang pagmamahal sa kapwa.

Respeto ang dapat nating pairalin kung gusto natin ay pagkakaisa bilang mga Pilipino. Dapat isipin na nakagisnan na lamang natin ang mga relihiyon na ating sinusunod o iba pang nililipatan, na isa sa mga dahilan kung bakit tayo nagkakawatak-watak ngayon bilang isang lahi. Hindi nakakamatay ang mga salitang binibitawan ng mga nagmamagaling na sila lang ang may karapatang makakaligtas sa araw ng paghukom. Hindi rin nakakamatay ang mga sinasabing pagkukunwari ang pinapakita ng iba na sila ay maka-Diyos kaya araw-araw nagdadasal o walang palya ang pagsamba. Hayaan nating mapaos ang mga nagsasalita dahil hindi naman tayo hihimatayin, maliban lamang kung magtapat sila sa ating tenga ng loudspeaker!

Mas maganda sanang sa halip na tingnan natin ang mga pagkakaiba ng mga relihiyon, tumingin tayo sa mga pangangailangan ng LAHAT ng tao na dahil sa kakapusan, madalas na mga resulta ay gutom at sakit. Ang mga pagkakaiba ng mga relihiyon ay gawa lamang ng mga taong nagtatag sa mga ito, mga taong may pansariling pakay kaya gusto nilang dumami ang kanilang nasasakupan.

Ang gutom at sakit ay walang pinipiling hanay. Nadadanasan sila ng LAHAT ng tao, ano man ang relihiyon nila. Bakit hindi ito ang pagtuunan natin ng ating pansin, at hindi ang mga problema ng mga relihiyon nila na ang dahilan ay hindi pagkakaunawaan ng kanilang mga pinuno na ang hangad ay walang katapusang kapangyarihan?

Mabuhay ang IGLESIA POWER!…tanda na kaya ito na maaaring magkaisa ang mga simbahan sa Pilipinas?

MABUHAY ang IGLESIA POWER!

…tanda kaya ito na maaaring magkaisa

ang mga simbahan sa Pilipinas?

Ni Apolinario Villalobos

Na-“ay mali!” si DOJ Secretary, de Lima nang nagpa-istaring dahil sa personal na paghawak sa kaso ng Iglesia ni Cristo (INC). Akala niya, dahil ang kinilingan niya ay ang sinasabing “original” faction, in the bag na ang suporta para sa kanya at Mar Roxas sa darating na eleksiyon. Hindi niya akalain ang resulta na pagdagsa ng mga supporter ng kasalukuyang nakaupo sa pamunuan ng INC. Ang tawag sa nangyari sa kanya ay “supalpal to the max”…sagad todong kahihiyan!

Bakit ba naman hindi maituturing na kahihiyan, eh malinaw naman talagang “selective justice” ang pinakita niya sa pag-aksiyon agad sa kaso, ganoong napakarami pang nakapila na mas mahalaga, lalo na ang SAF 44 Massacre at Maguindanao Massacre, pati ang dapat na isusunod pang kaso na may kinalaman sa pork barrel.

Sa ginagawa ng INC, pinapakita nito na pagdating sa pagkilos laban sa katiwalian, hindi rin sila napapag-iwananan. Noon kasi, ang EDSA People Power na ikinahihiya na ng maraming sumapi, ay pinangunahan ng mga kasapi sa simbahang Katoliko.

Maganda sana kung magsanib ang dalawang simbahan – Katoliko at INC upang labanan ang katiwalian sa gobyerno…lalong maganda kung sumama na rin ang grupo ng mga Muslim, at charismatic groups. Ang ganitong pagkilos ay pagpapakita ng tunay na kaisahan ng mga Pilipino sa kabila ng pagkakaiba sa pananampalataya. Iisa lang naman ang nilalabanan nila kaya walang dahilan upang hindi sila magkaisa sa puntong ito.

Kung mangyayari ang inaasam na ito…maaari sigurong tawagin itong FILIPINO POWER na talaga!