Ang Mga Kapalpakan ng Department of Health na Dinagdagan ng Condom

ANG MGA KAPALPAKAN NG DEPARTMENT OF HEALTH NA

DINAGDAGAN NG CONDOM

Ni Apolinario Villalobos

 

Ang nakaraang namuno ng Department of Health (DOH) ay tinanggal dahil sa mga isyung may kinalaman sa maling paggamit ng pondo. Hindi pa gaanong nabibigyan ng pansin ang kapalpakan sa isyu ng health center sa mga barangay na kulang o walang health workers kaya nagkakaroon ng patlang-patlang na iskedyul o “alternate”, ng mga health workers sa dalawa o mahigit pang barangay. Tinitipid din sa suweldo ang mga health workers. Ang matindi, kalimitan ay wala pang istak na gamot ang mga health center! Baka wala pa nga itong nagagawang programa para magbigay- buhay sa ideya ni Duterte na buksang muli ang mga Botika ng Bayan….hanggang ngayon ay walang naririnig tungkol dito, na dapat ay meron na.

 

Sa kabila ng patung-patong na problema ng DOH, gusto pa nitong mamigay ng condom sa mga estudyante sa high school na kung susumahin ang gastos ay aabutin ng bilyong piso. Ang nakakahiyang isyu dito ay ang obvious na pagsisipsip ng bagong namumuno ng DOH sa presidente na ang gusto ay makontrol o matigil ang pagtatalik ng mga kabataan na nagiging dahilan ng pagdami ng mga magulang na nasa batang gulang o menor de edad, at pagkalat ng AIDS. Narinig lang ang panukala ay inisip agad  ang pagbigay ng condom sa mga estudyante, na para bang wala nang ibang paraan! Sa gustong mangyari ng DOH,  parang babaril ito ng asong kahol ng kahol upang tumahimik…na pwede namang hampasin lang!

 

Lahat ng bagay na binibigay ay inaasahan nang may paggagamitan ng binigyan. Halimbawa, ang  baong pera na ibinigay sa mga estudyante ay pamasahe sa pagpasok at pambili ng pagkain. Binibigyan din sila ng papel o notebook para may masulatan….ng ballpen o lapis para may magamit sa pagsulat. NGAYON, BAKIT SILA BIBIGYAN NG CONDOM…DAHIL BA INAASAHAN SILANG MAGSI-SEX? YAN YATA ANG NASA ISIP NG BAGONG NAMUMUNO NG DOH….NAPAKARUMI NAMAN! BAKA INIISIP NIYA NA ANG PALAGING PINAG-UUSAPAN NG MGA MAGBABARKADANG ESTUDYANTE AY KUNG SAAN ANG PINAKAMURANG LODGE O MOTEL! DAPAT MAG-CHECK KUNG MAY KAKUTSABANG OPERATORS NG MOTELS O MANUFACTURERS NG CONDOM. Hindi ako masisisi sa pag-isip ng mga ganoong bagay dahil binigyan ako ng dahilan. Hindi bobo ang mga Pilipino…yan ang dapat isaalang-alang ng DOH.

 

Ang dapat na mangyari sana ay lalo pang paigtingin ng Commission on Higher Education (CHEd) ang Sex Education. Dapat ding pitikin ng pamahalaan ang mga magulang na may mga kakulangan sa pagpapatnubay ng kanilang mga anak. May mga magulang kasi na mas gusto pang makipagbarkada sa mga ka-madyong at ka-ballroom kaysa mag-check ng mga pangangailangan ng mga anak. Akala ng maraming magulang ang pangangailangan ng mga anak nila ay hanggang pera lang. Dahil sa kapabayaang iyan ay nabaling ang tiwala ng mga anak nila sa mga kabarkada.

 

Sa panig naman ng DOH, dapat ay asikahun nito ang mga nakakahiya nitong problema dahil sa kabila ng malaking budget ay wala namang nakikitang maayos na programa ang mga Pilipino.  Pera ng bayan ang malalagay sa alanganin kapag hindi ito nagastos ng maayos na nangyayari na nga. Kung iniisip ng bagong pamunuan ng DOH na nakakatulong ang condom upang maiwasan ang buntisan ng mga kabataan…paano na ang moralidad na pundasyon ng kultura ng Pilipino?  Dahil sa panukala ng bagong kalihim ng DOH, MISTULANG NANG-UUDYOK ITO SA MGA ESTUDYANTENG MAG-SEX…. OKEY LANG DAHIL MAY LIBRENG CONDOM NAMAN…KAYA SAFE!

Ano Ba Talaga ang Papel ng Department of Health (DOH)?

Ano Ba Talaga ang Papel ng Department of Health (DOH)?

Ni Apolinario Villalobos

 

Nagbitaw na naman ng deklasrasyon ang isang Dr. Go ng Department of Health (DOH) tungkol sa dahon ng guyabano na kapag ginawang tsaa ay makakasira daw ng kidney o bato, ayon sa isang brodkaster ng isang radio station. Ang isyu lang naman dapat ay tungkol sa isang naka-pack na produkto na guyabano juice concentrate na pinaghinalaang peke dahil walang detalyadong impormasyon dito kaya pinag-iingat ang publiko. Subalit sa hindi malamang dahilan, pati ang dahon ng guyabano na matagal nang ginagamit hindi lang ng  mga mga Pilipino kundi pati na ng mga taga-ibang bansa ay pinakialaman.

 

Ang impormasyon tungkol sa bisa ng guyabano ay alam na ng mga katutubo ng Amazon (south America) bago pa man dumating ang mga taga-Europe na sumakop sa kanila. Mismong mga taga-Europe ay gumawa ng katalugo ng mga halamang gamot na makikita sa kagubatan ng Amazon, at kasama diyan ang guyabano. Dahil diyan, may kung ilang dekadang pinag-aralan ng mga may pinag-aralang scientists daw na kunektado sa mga komersiyal na laboratoryo ang pagkopya ng mga elemento at sustansiya sa tanim na ito subalit nabigo sila. Nang panahong yon ay talagang mistulang nagkaroon ng blackout sa impormasyon tungkol sa guyabano kaya hindi ito nakakalabas sa South America. Pumutok lamang ito nang ilathala sa internet ng mga nakadanas ng kalunasan mula sa tanim. Kaya dahil sa animo ay napahiya, hinayaan na lamang ng mga ganid na interesadong masolo ang pakinabang sa guyabano.

 

Dahil sa tinuran ng isang Dr. Go na taga-DOH, para na rin niyang sinabi na ang iba pang halaman na itinuturing na nakakagamot tulad ng banaba, lagundi, tawa-tawa, bayabas, mangga, at marami pang iba na nakikita saan mang sulok ng Pilipinas ay nakakasira din ng kidney. Baka gusto niyang isama pa diyan ang tanglad na tulad ng guyabano ay itinuturing din na wonder herb dahil nagagamit ding panlaban sa kanser.

 

Ang isang kapalpakan ng sistema sa Pilipinas na may kinalaman ang DOH ay ang paglagay pa ng disclaimers sa mga pakete ng mga halamang gamot na nagsasabing hindi sila gamot at hindi nakakagamot ng anumang sakit. At, ang nakakatawa, ito ay binabanggit sa komersiyal, pagkatapos ng testimonya ng taong napagaling ng ina-advertize na halamang gamot. Bakit pinagastos pa ang gumawa ng gamot sa pag-advertise ganoong may ipinilit sa kanilang disclaimer? Ito ang isa sa mga kahangalan ng mga makabagong kaalaman daw na natutunan sa mga eskwelahan! At, yan ang isa sa mga matinding pagkukunwari ng sistema sa larangan ng “makabagong medisina” na ang inaasahan ay mga artispisyal na gamot o synthetic kaya hindi nalulusaw sa loob ng katawan at nadedeposito sa kidney, na siya namang tunay na dahilan ng pagkasira nito.

 

MARAMI ANG NAKAKALIGTAANG GAWIN NG DOH TULAD NG MGA SUMUSUNOD:

 

  • HINAYAANG MABULOK ANG FABELLA CENTER UPANG BANDANG HULI AY MAKITANG DELIKADO NANG GAMITIN, AT UPANG MAPAKINABANGAN DAW AY KAILANGANG IBENTA – GAWING PERA….KANINO?…EH DI, SA MGA DEVELOPERS KAYA ASAHAN ANG PAGSULPOT SA LUGAR NA YAN NG CONDO/COMMERCIAL BUILDING O ISA PANG MALL UPANG TABIHAN ANG ISA PANG MALL NA SIYANG KALAKARAN NG NEGOSYO SA PILIPINAS. PWEDE NAMANG AYUSIN ANG FABELLA CENTER TULAD NG PAG-RETROFIT GAYA NG GINAGAWA SA NATIONAL LIBRARY OF THE PHILIPPINES, PERO BAKIT HINDI GINAWA? ANG FABELLA CENTER AY NASA GITNA NG MAHIRAP NA KOMUNIDAD NA NANGANGAILANGAN NG SERBISYO NITO KAYA DAHIL SA NANGYARING KAPALPAKAN, ASAHAN NA ANG PAGLOBO NG MAS LALONG PAGHIHIRAP NG MGA MANGANGANAK NA WALANG PAMBAYAD SA MGA OSPITAL…AT PAGKAMATAY NG MGA SANGGOL NA PINAPANGANAK SA MGA BANGKETA AT DEPRESSED AREAS.

 

  • HINDI IPINAGLABAN ANG MAGNA CARTA NG MGA NURSES NA AKALA NI PNOY AQUINO AY TUNGKOL LANG SA SUWELDO, KAYA HINDI NIYA ITO PINIRMAHAN, GANOONG NAKAPALOOB DITO ANG IBA PANG MAHAHALAGANG BAGAY NA MAY KINALAMAN SA PAGPAPAHALAGA AT PAGPROTEKTA NG PROPESYONG NURSING.

 

  • HINDI PAGPATIGIL SA PAGGAMIT NG MGA NAKALALASONG PRESERVATIVES SA MGA SARIWANG ISDA, GULAY AT PRUTAS SA PALENGKE. KAYA ANG NABIBILI TULAD NG TALONG AT KAMATIS NA SARIWANG TINGNAN SA LABAS DAHIL MAKINTAB AY BULOK NA PALA SA LOOB; ANG MGA ISDA NA PULA NGA ANG HASANG AT MATIGAS PERO KAPAG INILUTO NA AY NADUDUROG NAMAN AGAD; ANG TINADTAD NA LANGKANG PANGGULAY AT PUSO NG SAGING NA PABORITO NG MGA PILIPINO AY IBINABABAD DIN SA GAMOT UPANG MANATILING SARIWA, PERO MAHIRAP PALAMBUTIN KAHIT ISANG ORAS O MAHIGIT PANG PINAKULUAN AT MAPAIT ANG LASA. MAY MGA STAFF NAMAN ANG AHENSIYANG ITO NA NAMAMALENGKE KAYA HINDI PWEDENG HINDI NILA ALAM ANG MGA NANGYAYARI, AT MISMONG MGA OPISYAL AY GANOON DIN DAHIL ANG ESKANDALONG ITO AY PALAGING NIREREPORT SA RADYO, PERO WALA SILANG AKSYON.

 

  • ANG MGA HEALTH CENTER SA BARANGAY AY KULANG NG MGA HEALTH WORKERS. MALIIT NA NGA ANG ALLOWANCE AY INIPIT PA ANG PAGDAGDAG NG MGA TAUHAN KAYA INI-ISKEDYUL ANG PAG-REPORT NILA SA MGA BARANGAY DAHIL NAGLALAGARE SILA SA IBA PANG BARANGAY. AT, HINDI RIN NAISIP NG DOH NA ANG AMBULANSIYA SA MGA BARANGAY AY DAPAT NASA PANGANGASIWA NG HEALTH CENTER DAHIL ANG MGA BARANGAY AY MAY SARILI NAMANG MGA SASAKYAN NA ANG IBA NGA AY AIRCON PA. ANO BA ANG GAMIT NG AMBULANSIYA?….AT SA ANONG AHENSIYA NAKAPAILALIM ANG HEALTH CENTERS?

 

Dahil sa walang pakundangang pagsasalita ng isang Dr. Go ng DOH laban sa guyabano, siguradong magkakawing-kawing na ang negatibong epekto nito sa mga Pilipinong naniniwala sa mga naririnig nila sa radyo. Yan ba ang gustong papelin ng DOH?

 

 

 

Ang Nakaambang Alalahanin Kung Politician ang Maging Kalihim ng DOH

Ang Nakaambang Alalahanin

Kung Politician ang Maging Kalihim Ng DOH

ni Apolinario Villalobos

Kung aalagwa ang kaso laban kay Ona batay sa mga katiwalian sa Department of Health (DOH), na inaasahan na, siguradong mapapatalsik ito sa kanyang puwesto. At, ang pumuporma na maliwanag pa sa sikat ng araw ang hangad na maupo sa puwesto ay isang politician, si Janet Garin.

Ang kalakarang pagtalaga ng mga Presidential appointees sa mga puwesto ng mga sensitibong ahensiya ang isa sa mga nagnanaknak na kanser na nagpapabulok ng gobyerno ng Pilipinas. Lahat na halos ng mga ahensiya ay puro political appointees ang mga kalihim kaya sumasabay sa paggawa ng mga katarantaduhan dahil co-terminus ng Presidente ang kanilang pagkatalaga. Ibig sabihin, “strike while the iron is hot”. At kung wala na sila, wala na ring masisisi. Aasa pa ba tayo sa bulok at makupad pa sa pagong na pag-usad ng hustisya sa ating bansa?

Ang DOH ay isang masaganang larangan ng oportunidad upang kumita. Katulad ng DSW at Department of Agriculture, nakikitaan ang DOH ng mga proyekto na ang closure ay hindi nangangailangan ng mga tangible o nakikitang patunay. Ang maraming kailangang proyekto para sa “ikabubuti” daw ng mga mamamayan, ay nagkikislapan sa sagisag ng piso! Malapit din ito sa mga tao, kaya magandang springboard ng ambisyosong pulitiko.

Hindi maayos ang sistema ng DOH sa kabuuhan, dahil ang budget nito ay hindi nagagamit sa magandang paraan. Ipinapasa nito sa lokal na pamahalaan ang mga kapalkan na resulta ng kanilang kapabayaan. Nakakalusot sila dahil mahina rin ang ahensiyang dapat ay nag-aawdit, ang Commission on Audit (COA), dahil kung ginawa lamang ng huli ang trabaho nito ay hindi dapat nakakalusot ang pagbili halimbawa, ng gamot pambakuna na sa umpisa pa lang ay mismong WHO na ang nagsabi na hindi angkop sa pangangailangan ng Pilipinas.

Sa pagkawala sandali ni Ona, may itinalaga na isang “acting”, pero sa ilang araw pa lang nitong pag-upo sa puwesto ay nakitaan na agad ng pagka-“overacting”, at pagkamakasarili dahil marahil ang tingin niya sa ahensiya ay isang tuntungan na magagamit niya sa pagsulong ng kanyang ambisyon sa pulitika…ayon yan sa mga brodkaster na nagmamatyag.

Ano na ang nangyari sa Career Service Program ng gobyerno? Bakit hindi ibigay ang pagkakataon sa mga Career Service Officers na nakapila upang mapausad ang kanilang karera? Ang iba na deserving o karapat-dapat ay inabot na ng retirement o kamatayan, ngunit hanggang Assistant Secretary lang ang inabot, ni hindi man lang nakatikim ng kahit sandaling appointment bilang Undersecretary.

Kung hindi mababago ang ganitong kalakaran na isang malinaw na instrumentp ng korapsyon, wala ngang kahihinatnan ang ating bansa…habang buhay na itong gagawing palabigasan lamang ng mga tiwaling opisyal. At, ang kawawa ay ang mga Pilipino na nagpapawis at nagpapakahirap upang makabayad ng buwis, na wala namang katumbas na kaginhawahan!

May Nagmagaling na Namang Opisyal ng Gobyerno

May Nagmagaling na Namang

Opisyal ng Gobyerno

…noon si Petilla, ngayon si Garin naman

Ni Apolinario Villalobos

Nakakagulat at nakakagalit ang ginawang pagbisita ng OIC ng Department of Health (DOH) na si Janet Garin at Gen. Catapang sa isang isla sa Cavite kung saan ay naka-quarantine ang mga sundalong galing sa peace keeping mission sa isang bansa na may epidemya ng ebola. Sa kagustuhan nilang ipakita na wala dapat katakutang ebola dahil hindi naman daw nabitbit ng mga sundalo, biglang naisipan ng mga pumapapel na bisitahin ang nanahimik na mga sundalo sa isla! Ang tanong ngayon ay, bakit dinala pa ang mga sundalo sa isla upang ma-quarantine? Siguradong gagayahin sila ng mga pamilya ng mga sundalo na magpipilit pumasyal sa isla dahil wala naman palang dapat katakutan, lalo na at mismong taga-DoH pa ang nagsalita.

Nagpapakitang gilas ang OIC ng DOH na si Garin. Gusto yatang pumalit agad sa nakaupong kalihim na ngayon ay may hinaharap na kaso. Mabilis ding magkaila si Garin na ang mga sintomas ng mga dinaramdam ng mga sundalo, kahit hindi pa nasususri ay hindi daw sanhi ng sakit ng ebolal. Ang hilig manguna…nagmamagaling….talagang pumapapel! Dapat hintayin niyang matapos ang quarantine period ng mga sundalo bago siya magyabang. Dahil sa ginawa nila, dapat i-quarantine din ang grupo ni Garin sa isla dahil inilalagay nila sa balag ng alanganin ang sitwasyon ng bansa lalo na at naka-schedule ang pagbisita ng santo Papa, at sa harap ng masugid na pag-promote ng turismo ayon sa inaadhika ng ASEAN.

Ang ipinapakita ni Garin ay palatandaan ng isang opisyal na sipsip. Dapat ang mga tulad niya ang tinatanggal sa tungkulin dahil hindi nakakatulong sa pangulo na dapat ay binibigyan ng mga tamang impormasyon. Marami ang tulad ni Garin sa gobyerno na sa pamamagitan ng pagpapapekl ay pilit pinagtatakpan ang kahinaan nila bilang mga kalihim o opisyal sa ilalim ng administrasyon ni Aquino.

Ang pagmamagaling ni Garin ay ipinakita rin ni Petilla, kalihim ng Department of Energy. Sa pagsisimula ng kanyang panunungkulan, gusto agad niyang ipakita na walang problema sa kuryente, sa ilalim ng administrasyon ni Aquino. Makalipas ang ilang buwan, sinabi na niya na may nakaambang problema. Bandang huli, nagpanukala na ng emergency power para kay Aquino dahil delikado na ang supply ng kuryente sa susunod na taon, subalit napatunayan naman sa isang Senate hearing na hindi naman pala totoo. Sa nangyari, abut-abot na kahihiyan ang bumuldyak kay Petilla, na sa kabila ng panawagang mag-resign siya ay kapit-tuko pa rin sa puwesto! Hindi lalayo ang ginagawa ng dalawa sa ginagawa ni Dinky Soliman ng DSW, na pinagtatakpan ng maling report ang mga kapalpakan ng kanyang ahensiya.

Mga Kuwento tungkol sa Barangay Health Workers

Mga Kuwento Tungkol

sa Barangay Health Workers

ni Apolinario Villalobos

Hindi dapat balewalain ang nakakaawang sitwasyon ng mga barangay health centers ngayon. Sa isang banda ay pwedeng gawin ito ng pamahalaan kung ang layunin nito ay hayaang mamatay ang maraming Pilipino upang mabawasan ang lomolobong populasyon ng Pilipinas. Ganoon lang ka-simple.

May magkakalapit na mga barangay ang naghahati ng serbisyo ng mga health workers na nakatalaga sa kanila sa loob ng isang linggong pagdo-duty ng mga ito. Ito ang remedyong ginagawa ng mga opisyal upang kahit papaano ay makapaglingkod pa rin ang mga health workers sa mga tao kahit lumalabas na overworked na sila. Maganda ang sistema sa punto ng samahan o bayanihan.

Subalit kung bubusisiin, hindi dapat ganito ang nangyayari dahil may karampatang budget namang nakalaan para sa mga health workers na may kanya-kanyang pinangangalagaang barangay. Lumalabas na sa halip na mapunta sa tamang pinaglalaanan ang budget, napupunta ito sa bulsa ng mga tiwaling opisyal. Ibig sabihin, tinitipid ang pera na dapat sana ay magamit sa taong bayan, upang manakaw lang!

May mga health workers na siniswelduhan ng mga local governments na sa aking pananaw ay hindi dapat. Ang budget para dito ay dapat galing sa national agency na DOH. Ang partnership ng DOH at local governments ay dapat limitado sa pagpapatupad ng mga programa. Maliit ang budget ng mga local governments at sila ay may mahahalaga ring pangangailangan. Kung ganito din lang ang sistema, dapat tuluyan nang i-decentralize ang health system at buwagin ang DOH, at italaga ang responsibilidad sa mga local governments na ang budget ay manggagaling sa buwis na awtomatikong kakaltasin sa mga binabayad na buwis.

Sa ganitong paraan, mapagtutuunan pa ng mga local governments ang mga proyekto. Ang mga malalaking ospital ng gobyerno ay pwedeng gawin “self-governing” batay sa kanilang mga patakaran upang mawala ang bureaucracy, ang mga red tapes. Iilan lang naman ang mga ospital na ito. Kung ganito ang mangyayari, wala nang tone-toneladang gamot na bibilhin upang maistak sa mga bodega na hindi naman naipapamahagi ng maayos kaya inaabot ng expiration. Wala na ring kalihim na mag-iisip ng mga animo ay panaginip na proyekto tulad ng “stem cell research”, dahil sa kawalan ng magawa.

Samantala, ang mga kawawang health workers ay nanlalagkit ang katawan dahil sa pawis, at animo ay basang sisiw naman sa ilalim ng ulan, sa pagbabahay-bahay nila upang magpatupad ng mga programa. Dahil sa kagustuhang makapagserbisyo, natitiis nilang mag-abuno ng gastos para sa pamasahe, magbaon ng kanin, kamatis at tuyo o di kaya ay nilagang talbos ng kamote na makakain sa lilim ng puno pagdating ng tanghali, di kaya ay sa karinderya kung meron nito sa paligid upang makahingi man lang ng libreng sabaw. Yong mga assigned sa mga liblib na lugar, halos hindi makalunok ng laway dahil sa nerbiyos habang naglalakad o nakasakay sa habal-habal upang makadaong- palad ang mga taong ni hindi nakakita ng antibiotic o diatab.

Malayo ang DOH ngayon sa DOH noong kapanahunan ng yumaong Juan Flavier. Ang kalihim ngayon, si Ona, ni hindi pa yata nakarating sa mga islang barangay upang makakita ng tunay na kalagayan ng mga taong nangangailangan ng gamot o hindi pa natusok ng hiringelya upang mabakunahan. Pero, marami din naman siyang napasyalan – malalayong bansa, kung saan nakakita siya ng mga high tech na laboratories na nagsasaliksik tungkol sa stem cell!

Maraming Dapat Sagutin si Secretary Ona ng Department of Health

Maraming Dapat Sagutin

Si Secretary Ona ng Department of Health

Ni Apolinario Villalobos

Ang isyu sa vaccination program ng Departent of Health (DOH) na mismong ang Pangulo ang bumubusisi ay katiting lamang na piraso ng mga dapat sagutin ng kalihim na si Ona. Ang pumutok na isyu tungkol sa malaking badyet na gusto niyang ilaan para sa pagsaliksik ng mga bagay na may kinalaman sa “stem cell” operation ay dapat na nagsilbing babala sa kanya…pahiwatig na maraming kwestiyonableng programa ang DOH. Idagdag pa rito ang mga gamot na hinayaang nakatambak sa bodega kaya inabot ng expiration, samantalang ang mga barangay sa buong bansa ay wala man lang magamit kaya bumibili na lang gamit ang sarili nilang pondo.

Sa kabila ng mga naghuhumiyaw na katotohanan tungkol sa mga batang maysakit at naglolobohan nilang tiyan dahil sa malnutrition, mga barangay na walang istak na mga gamot, underpaid na mga health workers na ang iba ay sinisuwelduhan na lang ng mga local government units, at kakulangan ng mga ito kaya nagsi-share sa serbisyo nila ang mga magkakalapit na mga barangay, iba ang pinagtutuunan ng pansin ng kalihim – mga programang hindi makatotohanan o pangmayaman gaya ng “stem cell research”.

Ilan nang health workers ang nakausap ko at nagsabi na bukod sa kanilang mababang sweldo, ay wala rin daw silang transportation allowance kung sila ay magbahay-bahay sa pagpapatupad nila ng mga programa ng gobyerno, wala rin silang food allowance, at lalong walang hazard pay ang mga nakatalaga sa mga delikadong lugar. Yong isa ay nagbanggit na maski payong ay hindi man lang sila mabigyan. Hindi naman daw nila magamit ang mga payong na bigay ng mga epal na pulitiko dahil may larawan nila. Marami akong natitiyempuhang nagpapahinga sa mga karinderya upang kumain ng tanghaliang baon nila at dinadagdagan na lang ng kalahating order na ulam at hininging libreng sabaw. Yong isa kawawa dahil itinali na lang ng straw ang napigtal na strap ng kanyang sandal, kaya ibinili ko ng mumurahing gomang tsinelas sa malapit na palengke.

Habang ang DSW ay nakakapagbigay ng pera sa mga mahihirap na magulang daw , ang mga kawawang DOH health workers na ang tungkulin na may kinalaman sa kalusugan at buhay ng mamamayan ay napapabayaan. Sa ginagawa ng pamunuan ng DOH, paanong makakatagal ang mga tauhan nito sa pagpapatupad ng mga programa para sa taong bayan na “inaakay” daw ng Pangulo sa pagtahak ng tuwid ng daan daw, kung sila mismo ay nangangailangan din ng tulong?

Ang Kayabangan ng DOH

Ang Kayabangan ng DOH

Ni Apolinario Villalobos

Sa pagputok ng mga balita tungkol sa Ebola virus sa ilang bansa ng Africa, umiral na naman ang kayabangan ng Department of Heatlh (DOH). Hindi malaman kung ano ang gustong patunayan ng ahensiyang ito ng Pilipinas, pagdating sa pagtupad ng kanilang papel sa pagpangalaga ng kalusugan ng mga Pilipino. Baka gusto rin ng ahensiyang “isalang” ang mga sobra-sobrang mga narses at doktor na bumabaha sa bansa, mga nakaistambay at nagtitiyaga ng “allowance” na karamihan ay hindi pa umaabot ng sampung libong piso. Kung ang ikalawang nabanggit na dahilan ang gustong pairalin, parang gusto na rin ng ahensiya na magpakamatay ang mga Pilipinong narses at doktor sa Africa. May mga balita nang sa kabila ng halos balot-suman nang ginawa sa mga narses at doktor na nag-atupag sa mga pasyente sa mga bansang nasalanta ng Ebola virus, may mga nahawa pa rin.

Kayabangang maituturing ang pag-iingay ng DOH tungkol sa pagboluntaryo ng mga Pilipinong doktor at narses, dahil hindi nga nila magampanan ang inaasahan sa kanila dito sa ating bayan. Maraming mga barangay health centers na walang mga nars at doktor. Sana yong malaking budget na kinwestyon dahil inilagay ng DOH para sa research ng steam cell ay inilaan na lang sa mga allowances o sahod ng mga narses at doktor na itatalaga sa mga health centers. Kung ang mga barangay na nasa mauunlad na bayan at lunsod ay walang mga narses at doktor, paano na kaya ang mga liblib na barangay?

Dapat maghinay-hinay ang namumuno ng DOH na si Ona, sa pagsambit ng mga kung anong nasa kanyang diwa…na karamihan ay wala namang binatbat. Mas magandang asikasuhin niya ang mga sinasabing nag-eekspayrang mga gamot na nakaimbak lang, hindi maipamahagi dahil wala ngang mga doktor na mamamahala. Asikasuhin din niya ang mga nakatira sa mga iskwater na nakapaligid lang sa kanyang opisina, hindi ang magyabang ng kung anu-anong plano na hindi naman realistiko o makatotohanan. Ibig sabihin, tumigil siya sa pag-iingay upang mapansin ng media at makabawi sa kahihiyang tinamo sa kayang steam cell project na maliwanag na ang tinutumbok na makikinabang ay mga mayayaman!