Mga Napansin Kong Ugali ng Ilang Kababayang Nakatira sa Ibang Bansa

Mga Napansin Kong Ugali ng Ilang Kababayang Nakatira sa Ibang Bansa

Ni Apolinario Villalobos

 

Unang-una, bilib ako sa perception ng mga Pilipinong gumawa agad ng desisyon na lisanin ang Pilipinas at manirahan sa ibang bansa dahil napansin nilang hindi maganda ang pamamalakad sa gobyerno. Totoo naman, dahil sa pag-usad ng panahon ay lalong dumadami ang problema lalo na sa korapsyon. Sa kabila ng kanilang kinalalagyan ngayon, ang ilan sa kanila ay nakakapagpadala pa ng mga impormasyon tungkol sa ginagawa ng mga kababayang NASA AMERIKA AT IBANG BANSA na pilit na nagdidiskaril sa gobyerno ng Pilipinas.

 

Ang hindi maganda ay ang ginagawa ng ilan na naghahambing ng kinalalagyan nila ngayon sa kalagayan ng mga nasa Pilipinas. Mababasa ang takbo ng kanilang isip sa mga comments nila tulad ng, “ano ba kayo diyan….!”, “mabuti pa kami dito….”, “ano ba yang presidente NINYO….”etc.  Ang mga sinasabi nila ay parang asin na ibinudbod sa sugat na nagpapahirap na sa mga Pilipino dito sa Pilipinas.

 

Kung magbalikbayan naman ang ilan, unang napapansin agad ay ang trapik na para bang ikinabigla nila, ganoong maski saang lupalop ng mundo ay nakabalandra sa screen ng TV ang mala-impiyernong kalagayan ng trapik sa Manila, Cebu, Davao at unti-unti na ring nangyayari sa iba pang panig ng bansa. Para bang gusto nilang ipaalam na sila ay balikbayan, bagong dating, galing abroad, etc….sosyal nga naman! Kapag nilapitan ng namamalimos, kunwari ay mabibigla at magsasabi ng , “ano ba yan….bakit ayaw asikasuhin ng DSW?!”….NAKU NAMAN, PARA BANG HINDI NILA ALAM ANG KORAPSYON SA PILIPINAS!

 

Noong sila ay hindi pa nakarating sa ibang bansa kaya lumalanghap DIN ng maruming hangin ng Maynila at iba pang mauunlad kuno na mga lunsod ng Pilipinas, alam na ng mga stateside Pinoy na ito kung anong uri ng bansa meron tayo. Ang nadagdag lang sa landscape ay mga nagtatayugang commercial at condo buildings at pagdami ng mga Intsik na namumuhunan saan mang panig ng bansa…at, pagdagsa ng mga kababayang Badjao sa ilang lunsod. Dahil diyan, huwag na lang sana sila magtaka pa dahil nababalitaan naman sila ng mga kaanak na nasa Pilipinas.

 

Sa isang banda, bilib ako sa mga Pinoy sa abroad na ang layunin ay kumita lang upang makatulong sa mga mahal sa buhay na naiwan sa Pilipinas. Ang payo ko naman na unsolicited o hindi hiningi, yong mga nakalutang sa ere (air) ng bansang tinitirhan nila, huwag nang magdagdag ng pasakit sa mga naiwan sa Pilipinas sa pamamagitan ng mga binibitiwang unsolicited o hindi hininging arrogant comments, sa halip ay mag-imbita na lang sila ng mga kababayan to join them…join the fun in their new heavenly “home”!

Congratulations kay Secretary Lina!…lalo niyang pinasabog ang damdamin ng mga Pilipino laban sa administrasyon!

Congratulations kay Secretary Lina!

…lalo niyang pinasabog ang damdamin ng mga Pilipino

laban sa administrasyon!

ni Apolinario Villalobos

Malamang ay nagtitinginan ang mga taga-Malakanyang sa ginawang pambulabog ni Lina, bagong Komisyoner ng Bureau of Customs (BoC) sa nananahimik na mga OFW, na ang mga pamilya ay naghihirap at nagngingitngit na sa galit kay Pnoy dahil sa mga nangyayaring korapsyon na naging sanhi ng nakawan sa kaban ng bayan at kagutuman.

Ang tanong: PLANTED BA SI LINA NG OPOSISYON? Kung ang sagot ay OO…magaling sila!

Ayaw ko nang banggitin kung paanong nag-umpisa ang mga Lina sa kanilang mga negosyo dahil hahaba lang ang blog na ito…at isa pa, marami na rin ang nakakaalam. Tulad ng ibang “matitibay” ang kapit sa kanilang kinalalagyan ngayon, palipat-lipat din sila ng mga bakod, mula pa noong panahon ni Marcos.

Hindi inalintana ng administrasyon ni Pnoy ang sasabihin ng mga tao at mga kakumpetisyon sa negosyo ng cargo forwarding ang pagtalaga kay Lina bilang bagong Komisyoner ng BoC, dahil sa mga koneksyon nito sa iba’t ibang negosyo na may kinalaman sa cargo forwarding. Mapapaniwalaan ba naman ang sinabi nilang “pinutol” na nito ang kanyang mga koneksyon? Sino ba naman ang matinong magsasakripisyo ng pinaghirapang mga negosyo upang ipagpalit sa isang masalimuot na puwesto sa ilalim ng administrasyong uuga-uga ang pundasyon at iilang buwan na lang ang natitira sa pagpatakbo ng bansa…at kuwestiyonable pa ang mga accomplishments, kaya ang mga kandidadto sa 2016 ay mahihina?

Kung ang pinagbabasehan ni Lina ng kanyang nakakabiglang plano ay ang dating batas na ginawa ni Marcos, dapat ay nagkunsulta muna siya sa mga senador dahil ang maselang isyu ay may kinalaman sa lehislasyon na trabaho ng senado. Hinayaan muna sana niyang may gagawing bagong batas na dadaan sa proseso na siya naman niyang gagamiting batayan. At wala nang magrereklamo dahil may mga gagawing konsultasyon din sa mga grupong may kinalaman sa isyu ng balikbayan box. Yan ay kung talagang “tapat” ang kanyang “layunin” na kumita ang BoC para sa gobyerno. Subalit magkano lang ba ang kikitain sa isyu ng balikbayan box kung ikukumpara sa mga nakakalusot na mga kontrabando, na sinasabi ng marami na pinapalusot ng mga tiwali sa kagawaran?…na ang iba ay basura pa!!!!

Sinasabi ng BoC na sinisingitan ng mga OFW ang mga kahon ng mga mamahaling bagay para sa kanilang pamilya at yong iba ay nagagamit pa para sa droga. Bakit ngayon pa lang sila bumili ng scanning machines at bakit hindi sila gumamit ng sniffing dogs sa mismong BoC noon pa man? Sa kasalukuyang proseso, hinahayaan ng BoC ang pag-scan ng mga kahon sa mga receiving freight forwarding companies. Para bang sinabi nila na para wala nang tanungan at busisi-an, gamitin ang mga kumpanya na identified kay Lina.

Ang tungkol naman sa mga branded items na sinisingit daw, gaano kalawak ang kaalaman ng mga taga-BoC na original ang mga ito, ganoong alam naman nila na 8 out of 10 sa mga “branded” na produkto sa panahon ngayon ay peke? Nag-training ba sila para dito? At lalong walang sinabi ang mga shampoo, sabon, toothpaste, lumang damit, “Gucci” bag, sapatos, gamit na cellphone, at maraming pang iba na iniipon pagkatapos mabili sa mga “sale” upang makapuno ng isang kahon na nangyayari sa loob ng halos dalawang buwan kung ikumpara sa bilyon-bilyong pisong pinupuslit gamit ang malalaking container vans, at mga mamahaling kotse na idinadaan sa malalayong pantalan ng bansa!

Hindi pa ba kuntento ang gobyerno sa mga remittances ng mga OFW na ang iba ay nabubugbog at napapatay ng mga amo nila sa ibang bansa? Hanggang sa ganitong bagay ba ay bantad pa rin ang damdamin ng pangulo sa kalagayan ng mga OFW na itinuturing na makabagong bayani, at ang mga remittance ay isa sa mga inaasahan ng bansa? Hanggang ngayon ba ay hindi pa rin nauunawaan ng gobyerno na kaya nangibang bansa ang mga Pilipino ay dahil walang trabaho sa bansa o kung meron man ay kontraktwal na ang sahod ay hindi sapat?

Malamang kung hindi sa banta na talagang lalangawin ang Liberal Party sa darating na eleksiyon ay hindi nagpasabi si Pnoy na huwag munang ituloy ang balak ng BoC. Pero, sorry na lang siya dahil sa kasabihan sa Ingles na: “the harm has been done”.

Ngayon, dahil sa ginawa ni Lina, dalawa ang problema ng Malakanyang: i-check kung planted siya ng oposisyon, at ang kampanya ng mga OFW kasama ang mga naghihirap nilang pamilya at mga kaibigan na ibasura lahat ng mga tatakbo sa ilalaim ng Liberal Party!

Dapat alalahanin na lahat ay nangyayari pagdating sa pulitika – kahit patayan ng magkakapamilya! At ang palipat-lipat ng mga pulitiko sa iba’t ibang “bakuran” ay isa pang malaking pruweba!