Si Eboy at ang Kanyang Musika (para kay Eboy Jovida)

SI EBOY AT ANG KANYANG MUSIKA

(para kay Eboy Jovida)

Ni Apolinario Villalobos

 

Sa dami ng gustong niyang gawin

Upang maibulalas ang nasa damdamin

Musika ang piniling maging kasangkapan

Upang ang pakikibahagi ay sa kaaya-ayang paraan.

 

Sa pagitan ng isinulat na mga talata

Na binigyang buhay ng makukulay na nota

Nakapaloob ang mga nais niyang ipahiwatig

Umaalagwa mula sa pusong buhay ang pinipintig.

 

Sa pagtipa ng gitara at hihip sa pluta

Ligaya ay mababanaag sa kanyang mata

Na animo ang musika ay kanya na ring buhay

Kaya para sa kanya, ito ay hindi dapat mawalay.

 

Marami sanang nais niyang maibahagi

Musikang buhay na talagang katangi-tangi

Naudlot ng kapalaran, nakalaan para sa kanya

Hindi kayang iwasan dahil sa palad ay nakaguhit na!

 

Alaala niya, sa diwa nati’y di mawawala

Mababanaag ito sa bawa’t himig ng musika

Na naging kasingtunog na ng kanyang pangalan

Pahiwatig na kapiling natin siya magpakaylan man!

 

(pluta – flute)

 

 

Advertisements