Partido Pulitikal?…o Bayan!

PARTIDO PULITIKAL? O BAYAN!

Ni Apolinario Villalobos

 

Malalaman kung ang isang tao na may ambisyong pumasok sa pulitika ay taos sa puso ang adhikain sa pamamagitan ng mga binibitiwang pangako. May mga imposibleng pangako dahil  paulit-ulit na sinasambit nila ang mga nakalipas nang ipinangako noon ng mga pulitikong naging korap nang manalo. Hindi rin maiiwasan ang plastikan tulad ng nangyayari sa pagitan nina Duterte at Robredo, lalo pa at magkaiba sila ng partido. Sa puntong ito, si Duterte na mismo ang nagsabi sa isang interview na nakikita niya si Robredo sa mga rally para pabagsakin siya, at sa sunod nilang pagkikita sa meeting ay nakangiti pa ito ng buong tamis sa kanya. Magkaiba sila ng pinaghuhugutan ng lakas – si Robredo ay ang kanyang partidong kulay dilaw at si Duterte ay taong bayan na kailangan niyang iligtas mula sa lagim ng droga at korapsyon.

 

Kung partido ang pinaghuhugutan ng lakas ni Robredo, paano niyang masasabing siya ay kakampi ng bayan ganoong sumemplang na ang partidong ito dahil ang mga adhikain ay hindi makabayan?. Ang ganitong uri ng adhikain ay pangsarili lamang – personal, kaya gagawin ang lahat upang makakapit-tuko sa puwesto ng mga kapanalig nito.

 

Samantalang si Duterte na mula’t sapol ay naniniwalang nakatadhana siyang maging presidente para sa kapakanan ng bayan ay palaging taong bayan at kabataan ang laman ng mga talumpati. Ang isang patunay sa sinasabi niya ay ang pagkapanalo niya sa kabila ng kawalan niya ng sariling pondo para sa kampanya. Walang bahid na pangsarili ang kampanya niya laban sa droga dahil hindi naman niya ikayayaman ito, sa halip ay maglalagay lang sa kanya at pamilya niya sa delikadong kalagayan dahil ang binabangga niya ay mayayamang personalidad na sangkot sa droga.

 

Kung sinabi ni Duterte na wala nang puwang si Robredo sa administrasyon niya dahil obvious ang pagka-ipokrita nito, lalo pa at halatang walang simpatiya sa bayan…dapat lang! Ang opisina ni Robredo na tumutulong kuno sa mahihirap, silang mga nasa laylayan ng lipunan, mukhang hindi yata totoo. Yong isang kaibigan ko na mahigit dalawang buwan nang pabalik-balik upang humingi ng pandagdag sa gastusin sa pagpa-opera ng anak, hanggang ngayon, ni singkong duling ay walang natanggap. Hiningan pa ng staff ng bank account number para doon daw ipapadala ang tulong….na napakamaling sistema dahil pwedeng pakialaman ng mga magnanakaw ang impormasyon na yan, at higit sa lahat ay walang patunay na natanggap ng tao ang pera kung sakali man, kaya paanong maa-audit ng COA? Saan kaya nila nakuha ang ideyang itong napakamali?

 

Kung sasabihin ni Robredong wala siyang pondo, magtanggal siya ng mga pandekorasyong mga tao at isara ang opisinang pang-community outreach kuno na pandekorasyon lang din. I-maintain na lang niya ang opisina niya bilang Bise-Presidente…na standby lang hangga’t may mangyari sa presidente. Makipag-ugnayan na lang siya sa mga obispong Katoliko at mga grupo ng mga babaeng kapanalig niya at mag-camp out sila sa Liwasang Bonifacio o Luneta. Humingi kaya siya ng tulong kay Pnoy at Roxas….o baka nagbibigay na at para kung saan, sila lang ang nakakaalam!