Ang mga Pinapatay na Drug Users at Pushers

ANG MGA PINAPATAY NA DRUG USERS AT PUSHERS

Ni Apolinario Villalobos

 

Batay sa mga binanggit ni Kerwin Espinosa tungkol sa lawak ng pagkasangkot ng kapulisan, nakakabahala na hindi lang pala mga opisyal na nakaupo sa mataas na puwesto ang may kinalaman, kundi pati mga kapulisan sa ilalim. Malinaw na malinaw ang kuwento tungkol sa mga “recycled” na droga – mga drogang bahagi ng nakumpiska ng mga pulis at pinabebenta nila mga “bataan” nilang pushers. Ang mga nasa Maynilang pulis na nagre-recycle ay tinawag na “ninja cops”. Ang mga pushers ay nahahawakan nila sa leeg dahil nahuli na nila ang mga ito bilang mga drug users, kaya mistulang na-black mail upang magbenta ng “recycled” na droga, upang hindi tuluyang makulong.

 

Naipakita din noon sa TV ang isang witness na taga-Antipolo na nag-utos daw sa kanyang tatay na magbenta ng droga, at kung minsan daw ay sa bahay pa nila gumagamit nito. Mistulang nakalublob sa kumunoy ang tatay nilang pinatay nilang gumagamit din ng droga at ilang beses nang nahuli. Nang mapatay ang tatay nila ay positibo nilang itunuro ang mga pulis.

 

May mga pinapatay ngayong ayon sa mga kaibigan at kapamilya ay dati daw gumagamit LANG ng droga at sumuko na kaya nakalista sa presinto. Nagtataka lang sila kung bakit pinatay pa at siguradong hindi sindikato ang pumatay sa kanila dahil wala naman daw kilalang big-time pusher ang mga ito. Ang ibang namatay ay mga scavenger at “barker” sa mga jeepney station. Pero ayon sa kanilang mga kaibigan ay natutong gumamit ng droga na nagsimula sa rugby, pero bandang huli ay kumita dahil “naghahatid” na rin daw ng droga o naging “runner”. Kung minsan pa daw ay may kausap silang mga pulis.

 

Ang hinala, ay mismong mga pulis na sangkot sa droga pero hindi natanggal sa puwesto ang may kagagawan ng pagpatay upang hindi sila maituro pagdating ng panahon. Pinapatay nila ang mga nakakakilala sa kanila upang pagdating ng panahon ay hindi sila maituro. Kapag “lumamig” na ang sitwasyon dahil isinusunod na ang “corruption” kaya siguradong hihina ang operasyon laban sa droga, asahan ang mga bagong “set” ng drug pushers at runners. Hindi naman kasi nasisira ang shabu kahit itabi ng kung ilang taon….pwedeng ibenta after six years kung wala na si Duterte.