Ang “Blogger”, “Basher”, at “Nakawan” sa Internet

ANG “BLOGGER”,  “BASHER”

AT “NAKAWAN” SA INTERNET

Ni Apolinario Villalobos

 

Ang “blog” ay maaaring ituring na “noun” o “verb”. Kaugnay niyan, kapag “noun” ay pwedeng sabihing “the blog”, kapag “verb” ay masasabing, “to blog”. Subali’t kung tutuusin ay tungkol lang ito sa “pagsusulat” o “pagpo-post” ng buong sanaysay o komento man lang o di kaya ay ng larawan sa sariling facebook o sa facebook ng iba pero may pahintulot nila, at iba pang sites sa internet, lalo na ang mga pag-aari ng blogger.

 

Ang “basher” naman ay mga nagbabasa ng mga blogs at dahil kampon yata ng demonyo, sa halip na tumulong sa pagpapalinaw sa isinulat ng blogger, ay umiikot sa mga personal na bagay ang isinusulat bilang komento. Ibig sabihin ng “personal” ay tungkol sa mga bagay na may kinalaman sa blogger kaya nade-derail ang mensahe ng blog. Sila yong mga kung tawagin ay “viewers” o nagbabasa ng blogs na hindi nagpaparamdam at tumatayming ng blog na pwede nilang sirain o bulabugin kaya nagagalit rin ang ibang mga seryosong nagbabasa. Kalimitan ay gusto nilang palabasin na mas magaling sila sa blogger sa paggamit ng Tagalog o English, o di kaya ay palabasing mas maganda ang kanilang pananaw. Kung ganoon sana ang paniniwala at pananaw nila, sumulat na lang sila ng sarili nilang blog upang mai-post sa kanilang fb.

 

Sa isang banda, maraming taong matatalino sa larangan ng teknolohiya ang nakakakita ng “ginto” sa internet…mga oportunidad na pwede nilang pagkitaan sa anumang paraan, kahit masama. Ang isang paraan ay ang illegal na pag-hack ng mga sites, gawaing itinuturing ng mga hacker na isang prestihiyosong kaalaman. May mga hantaran pang umaamin na sila ay hacker dahil maraming tao at kumpanya ang umuupa sa kanila upang makapanira ng kalaban o kakumpetensiya sa negosyo. Yong ibang hacker naman ay pumapasok sa sites ng iba bilang katuwaan lang o para patunayan na sila ay magaling. Sa ganitong gawain ay may mga sinuswerte rin, tulad ng Pilipinong nag-hack ng IT system ng Pentagon. Sa simula ay kinastigo siya, pero kalaunan ay kinuha na lang ng Pentagon upang mapakinabangan ang kanyang katalinuhan.

 

Ang iba namang “magagaling” ay gustong kumita sa pamamagitan ng panloloko. Ang mga paraan ay, ang paggamit ng email kung saan ay magpapadala sila ng mga nakakaiyak na kuwento ng kanilang buhay upang makapag-solicit ng tulong; pakikipagkaibigan upang mapagamit sila ng bank account ng kinakaibigan na paglalagakan kuno ng perang minana nila; pagpapadala ng email message tungkol sa isang pasyente sa ospital na kailangang operahan kaya nakikiusap sa pinadalhan na ikalat ang message dahil kapag ginawa ito, bawat isang message na ipinadala sa isang kaibigan ay may katumbas na pisong didiretso sa isang account, kaya kung mag-viral ang message dahil sa dugtung-dugtong na koneksiyon ng mga may-ari ng emails, siguradong hindi lang 1 milyong piso ang malilikom; pagbebenta sa internet ng mga kalakal lalo na gadgets, subalit kapag nakapaglagak na ng bayad sa ibinigay na bank account ang niloko ay parang bulang mawawala ang on-line seller.

 

Ano pa nga ba’t ang magandang layunin sana ng teknolohiya ay sinira ng mga taong may mala-demonyong pag-iisip. Dahil sa mga nangyayari ngayon, nagkaroon ng agam-agam o takot ang mga internet users sa pagpadala ng mga mahahalagang impormasyon sa kanilang mga mahal sa buhay tulad ng numero ng passport, mga kopya ng dokumento, bank account number, numero ng telepono, at pati address ng bahay o negosyo. Yong isa ngang mayabang, nag-post lang ng kopya ng kanyang First Class plane ticket at boarding pass sa facebook ay nakuhanan na ng mga personal na detalye tulad ng contact number at address ng bahay na nakapaloob pala sa “bar code” ng boarding pass gamit ang isang skimming device na gawa sa China! Kaya habang nagliliwaliw ang mayabang at ang pamilya niya, inakyat-bahay sila! Nangyayari ito kapag ang pasahero ay miyembro ng promo program na nangangailangan ng mga personal niyang impormasyon, kaya ang pangalan niya ay naka-connect sa information archive ng information system ng airline.

 

Ang epekto ng teknolohiya sa tao ay hindi nalalayo sa epekto ng mga inimbentong bagay na magdudulot sana ng kaginhawaan sa buhay ng tao. Ang gamot halimbawa, ay inimbento upang makapagpahaba ng buhay, subalit inabuso, kaya may namamatay dahil sa overdose o maling paggamit. Ang baril ay inimbento sana upang maging proteksiyon subalit ginamit sa katarantaduhan. Ang dinamita na gagamitin lang sana sa pagpasabog lang ng malalaking tipak ng bato upang hind maging hadlang sa ginagawang kalsada sa gilid ng bundok ay ginamit sa maling pangingisda at terorismo. Ganon din ang ginawa sa marami pang inimbentong ginamit na pagpuksa ng kapwa-tao at kalikasan. At, lahat ng iyan ay nangyayari dahil sa pagkagahaman ng tao  na umiiral sa mundo!

 

 

4 thoughts on “Ang “Blogger”, “Basher”, at “Nakawan” sa Internet

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s