Hindi Dapat Asahan ang mga Survey

Hindi Dapat Asahan ang mga Survery
Ni Apolinario Villalobos

Obvious na ang mga survey ay hindi naman talaga accurate at kumakatawan sa isip at damdamin ng mga tao sa pangkalahatan. Ibig sabihin ay estimate lamang ang mga ito. Simple lang ang tanong: sa iilang libong iniinterbyu, ilang porsiyento ba sila ng milyones na kabuuhan ng population o bumobotong population? Ang bukod tanging epekto ng survey ay psychological o pangkaisipan lamang, dahil ang mga makakaalam ng resulta ay mag-iisip ayon sa gustong mangyari ng nagpasurvey.

Sa laki ng nagagastos kung gumawa ng survey, hindi makakagalaw ang survey firm kung walang uupa sa kanilang serbisyo. At kung sino man ang nagpapa-survey ay dapat lang na masiyahan sa resulta. Aanhin naman ng survey firm ang resulta ng survey kung walang nagbayad sa kanila upang gumawa nito?

Sa nangyayaring survey kung saan ay pumapaimbulog ang nakuhang resulta ni Poe laban sa nakuha ni Binay, ang tanong ay kung sino ang may gustong matalo si Binay. At sa ganitong plano ay halatang ginamit lang si Poe. Hindi pwedeng gamitin si Roxas dahil alam ng lahat na talagang wala naman siyang hatak sa mga botante kaya siguradong maraming magtataka kung umangat siya maski sa ikatlong puwesto man lang.

Ilang beses nang napatunayang hindi totoo ang ipinapahiwatig ng survey dahil noong nakaraan eleksiyon, ilang senador ang ni hindi man lang napasama ang pangalan sa listahan subalit nanalo pa rin. Ngayon, kahit mataas ang rating ni Poe, hindi nangangahulugang siya na nga ang mananalong presidente, lalo pa at malayo pa ang eleksiyon, at ni hindi man lang siya nagdedeklara ng kagustuhang tumakbo sa nasabing puwesto.

Sa aspeto naman ng ekonomiya, kinilig ng todo ang mga taga-Malakanyang nang malaman sa isang survey na umangat na daw ang Pilipinas kung ihambing sa mga kapitbansa nito sa Timog Asya. Talaga namang nang-insulto ang gumawa ng survey dahil malayo sa katototanan ang nakuha nilang resulta. Malamang na ang nagpagawa ng survey ay mga bangko na inuutangan ng Pilipinas para ipabatid na dahil umangat na ang ekonomiya nito ay pwede na uling umutang!..ganoon lang.

Ang ilan pang resulta ng survey ay tungkol sa pagkabawas daw ng malaki ng unemployment sa bansa, ganoong taon-taon ay nadadagdagan ito ng mga bagong graduates. Tinataon siguro ang survey na ito kung kaylan ay marami ang bagong na-hire na mga contract employees, na pagkalipas ng limang buwan ay tutunganga na naman.

Ang sa pagkain at gutom naman, nabawasan na rin daw ang gutom dahil nagiging self-sufficient na ang bansa, ganoong kasasabi lang ng Department of Agriculture na aangkat na naman uli ng bigas bago mag-Oktubre upang mabawasan ang kakulangan. Ang presyo ng mga bilihin sa palengke lalo na karne at isda, lalo pang tumaas. Dahil sa mga nabanggit, paanong nabawasan ang kagutuman, ayon sa survey, lalo pa at ang take home pay ng ordinaryong manggagawa ay kulang pa sa isang araw na panganailangan ng kanyang pamilya?

Talagang sa mundong ito, lokohan ang takbo ng buhay. Kaya kung minsan ay nakakatamad na ring magbasa ng diyaryo o makinig ng radyo dahil hindi na malaman kung alin sa mga balita ang totoo. Marami na rin kasing diyaryo at brodkaster na binabayaran.

Ang Mga Desperado sa Darating na Eleksyon 2016

Ang Mga Desperado sa Darating na Eleksyon 2016
Ni Apolinario Villalobos

Binay…..kailangan niyang manalo upang hindi tuluyang makulong dahil sa patung-patong niyang kaso. Ang hindi lang malaman ng mga tao ay kung ang ambisyon bang maging presidente ang nagtulak sa kanya upang “mag-ipon” ng panggastos mula pa noong Mayor siya ng Makati, kaya nangyari ang sinasabing pangungumisyon niya ng malaki sa mga proyekto sa Makati na ang ginawang dahilan na alam ng mga tao doon ay pagmamahal daw niya sa mga ito. Lumalabas kasi, gumawa siya ng long-ranged plan na nakakabilib!

Pnoy….kailangan niyang makahanap ng isang matapang at may paninindigang kandidato na mai-endorso upang kung sakaling manalo bilang presidente, ay ligtas siya sa mga balak ihaing kaso laban sa kanya. Hindi pwede si Roxas dahil walang mga ganoong katangian, kaya maski manalo ay siguradong matatalo lang ng mga kalaban niya (Pnoy) na may balak magpakulong sa kanya.

Roxas….kailangan niyang ma-endorso ng pangulo dahil maski simbahang Katoliko ay wala na ring tiwala sa kanya; ang huling hirit niya ay ang lumapit sa El Shaddai, Quiboloy Group na naka-base sa Davao, at ang Iglesia ni Kristo – kung papansinin siya dahil noon pa man ay hindi naman talaga siya nakitaan ng kahit kapirasong gilas. Ang pinapakita kasi niya hanggang ngayon ay ang pagiging “bow man” ng presidente – bow na lang ng bow!

Allan Peter Cayetano….noon pa man ay maingay na sa pagsabi na lahat naman daw ay may ambisyong umupo sa pinakamataas na pwesto sa gobyerno – kasama na siya doon; kailangan niyang manalo bilang presidente upang lalong malampaso ang mga Binay sa Makati na kapitlunsod ng Pasig.

Trillanes….kailangan niyang maging presidente upang maipakulong ang pinanggigigilang si Jejomar Binay; kung hindi pwede, maski bise-presidente na lang upang patunayang may anghang talaga siya bilang pulitiko…kailangan niyang patunayan na bilang dating taga-military ay matapang siya, kaya nga siya nasangkot sa mga coup d’etat noon.

Ang ibang mga taong binabanggit na maaaring tumakbo ay hindi naman ganoon ka-desperado, tulad ni Grace Poe na hanggang ngayon ay walang pakialam kahit mataas ang rating sa survey. Si Duterte naman ay neutral ang image kaya maski sinong manalo ay pwedeng kumuha sa kanya bilang isang kalihim ng gabinete na aangkop sa kanyang katapangan, at kung hindi naman niya kakagatin ay makakabalik siya sa pinakamamahal niyang Davao City, nagmamahal din sa kanya!