Napahiya ang mga Binay!….sa issue ng Doctrine of Condonation

NAPAHIYA ANG MGA BINAY!
….sa issue ng Doctrine of Condonation
Ni Apolinario Villalobos

Talagang gagawin ng mga Binay ang lahat upang manalo lang sila sa mga kaso. Kumuha sila ng neophyte na abogada na dating estudyante ng Chief Justice of the Supreme Court. Inaasahan nilang papabor ang Chief Justice sa abogada nila dahil estudyante nga naman. Subali’t tila naputukan sila ng bomba ng hiyain at halos bulyawan ng Chief Justice ang abogada dahil sa pinagpipilitan nitong Doctrine of Condonation upang maabsuwelto sa kanyang mga kaso si Junjun Binay. Sinasabi daw kasi sa doktrina na kung naboto uli ang isang nagkasalang opisyal, mababalewala na ang mga kasalanan nito.

Malamang halos himatayin sa inis ang Chief Justice sa pagsita sa nagmamarunong na abogada nang sabihan siya nito na ang gusto yata niyang mangyari ay umiral ang kaguluhan sa pag-unawa ng Saligang Batas. Ang doktrina kasi ay nakapaloob sa lumang Saligang Batas na nabago na, kaya wala nang bisa. Ang abogada ay si Sandra Marie-Olaso Coronel.

Malamang itong doktrina ang ginagamit ng mga abogado upang lumakas ang loob ng mga Binay sa kabila ng patong-patong nilang mga kaso. Lalo pang lumakas ang loob nila sa paggawa ng mga hakbang na halos ay lihis na sa good manners and right conduct. Pati ang anak na kongresista ay nagbanta na wala silang patatawarin sakaling manalo ang tatay niya. Para bang ang pagka-presidente ay in the bag na! At sinabi pa niya na ang Vice-President daw ang magbubuklod ng mga Pilipino!….WOW!

Ito ang mga taong tinutukoy kong naturingang nakapag-aral subalit ginagamit ang mga natutuhan sa pagbali ng katotohanan!

Isa pa…bakit pinipilit ng mga Binay ang Doctrine of Condonation? Nangangahulugan ba itong talagang may ginawang kasalanan? Hindi ba ito ay indirect na pag-amin?

Sigurado, nagsisisi ang Chief Justice kung bakit ipinasa niya ang estudyante niyang ito na kabago-bago ay nababahiran nan ng maitim na hangarin ang katauhan!

Bibili daw ang Pilipinas ng mga Barko…at may nanalo nang bidder, ang Japan

Bibili daw ang Pilipinas ng mga Barko
….at may nanalo nang bidder, ang Japan
Ni Apolinario Villalobos

Narinig ko ang balitang binabanggit sa titulo nitong blog habang kumakain ako ng almusal. May binanggit na bilang kung ilan, subalit nang banggitin na ang mga lugar kung saan ang mga ito ihihimpil ay muntik na akong mabulunan. Ang mga binanggit ay puro sa Luzon – Manila, La Union at Palawan. WALANG MAPUPUNTA SA VISAYAS AT MINDANAO!

Isa na namang kabobohan ng kung sinuman ang may ideya ng distribution ng mga barko na ang mga gamit daw ay para sa search and rescue, at relief operations. Sa Luzon lang ba may dapat ma-rescue at gumawa ng relief operations? Ang Mindanao, lalo na ang bandang southern part ay piniperhuwisyo ng Abu Sayyaf kidnappers na gumagamit ng kumpit…bakit hindi ito tapatan ng Coast Guard at Philippine Navy? Mahina ang control sa southern entrance/exit kaya dito dumadaan ang mga tumatakas sa batas, at paboritong lusutan ng mga kontrabando. Ang Visayas naman ay binubuo ng mga isla – malalaki at maliliit, kaya kailangan ding mayroong nakatalagang mga barko sa mga istratehikong daungan.

Natataranta ngayon ang pamahalaan dahil sa nangyayari sa West Philippine Sea na dapat siguro ay ibalik na lang sa tawag na South China Sea, malinaw na rin lang na walang magagawa ang Pilipinas sa kaswapangan ng mga lider ng Tsina. Bakit ngayon lang sila natataranta? Saan napunta ang perang galing sa pinagbentahan ng Fort Bonifacio noon pa man, na dapat sana ay para sa modernisasyon ng hukbong sandatahan ng Pilipinas? Sapat na ba ang biniling second hand na mga helicopter at mga armas, ganoong bilyones ang dapat na napunta sa proyektong ito?

Ang Pilipinas ay binubuo ng mga isla kaya ang kailangan ay mga sasakyang pandagat at panghimpapawid tulad ng helicopter man lang at mga modernong barko para sa Coast Guard at Philippine Navy. Hindi kailangan ng Pilipinas ang fighter planes dahil wala rin namang mapapala sa harap ng mga naghihigantihang ginagamit ng mga karatig-bansa lalo na ng Tsina. Ang inaasahan kasi ng Pilipinas ay ang iniiwang mga bulok na gamit-pandigma ng mga Amerikano pagkatapos ng “Balikatan exercises” taon-taon!

Nakakahiya ang Pilipinas…. dahil halos wala nang mukhang maiharap sa buong mundo lalo pa sa panahon ngayong tadtad ito ng mga problema na gawa mismo ng mga tiwaling opisyal sa pamahalaan!…at ang pinakakawawa ay ang mga Pilipino!

Magtataka pa ba tayo kung bakit gustong ihiwalay ng BIFF ang isang bahagi ng Mindanao mula sa Pilipinas? At hindi malayong mag-isip din ng ganito ang mga taga-Visayas – magkaroon man lang ng self-governing na rehiyon tulad ng nasa Cordillera at ang umiiral sa ngayon na ARMM, na kung matutuloy ay papalitan ng Bangsamoro. Pero, paano na ang sinasabi ngayon ng MNLF na gusto rin nila ng sariling rehiyon?