Malaki ang Problema ng Usapin sa Bangsamoro Basic Law (BBL)

Malaki ang Problema ng Usapin
Sa Bangsamoro Basic Law (BBL)
ni Apolinario Villalobos

Dahil sa nangyaring “misencounter” daw sa pagitan ng MILF at mga pulis sa Maguindanao kamakailan lamang, ay tila magkakaroon ng problema sa usapin ng Bangsamoro Basic Law (BBL). Sa pagpasok sa eksena ng BIFF na ‘breakaway” group ng MILF, marami ang nagtatanong kung talaga bang mapagkakatiwalaan ang MILF sa pagsiguro na hindi bubulabugin ng BIFF ang mga bayang kasama sa Bangsamoro, dahil tutol ito (BIFF) sa usaping pangkapayapaan. Kung hindi nakontrol ng MILF ang BIFF na magkaroon ito ng sariling adhikain kaya tumiwalag sa samahan, may garantiya ba na hindi ito maghahasik ng perwisyo upang ipahiya ang BBL?

Noon pa man ay nabanggit ko na sa nauna kong pananaw na ang inuna dapat ng gobyerno at MILF ay i-neutralize at dis-armahan ang MNLF at BIFF na kumokontra sa usaping pangkayapaan na nakaangkla sa integration, na taliwas naman sa gusto ng mga naunang nabanggit na ang gusto ay humiwalay sa bansang Pilipinas at magkaroon ng sariling gobyerno. Subalit nagmadali ang peace talk committee na isa sa mga arbiter ay Malaysia. Sa kabila ng nakaambang banta ng dalawang nabanggit na grupo ay pinipilit ng MILF na tapusin na ang usapan.

Hindi na-neutralize ang MNLF at BIFF sa kabila ng katotohanang tukoy ng sandatahang hukbo ng Pilipinas ang kinaroroonan ng mga ito. Ang ginawa lamang ay lumusob at nagpaulan ng mga bomba sa mga tukoy nang kuta, ilang araw lang at pagkatapos ay wala na. Para lang nagpa-presscon….nagpakita na kunwari ay may ginawa.

Ang pinagtaguan ng foreign terrorist na gumagawa ng bomba sa Maguindanao ay matagal na rin palang tukoy. Bakit hindi hiningi ang tulong ng MILF sa pagdakip dito, upang makapagpakita naman ang huling nabanggit ng taos-pusong kaseryosohan na magkaroon ng katahimikan sa Mindanao? Ang pagkakataong ito ay hindi dapat pinalampas ng peace talk committee bilang pagpapakitang-gilas. Kung sakali, doble pa ang magagawa sana nila dahil matutumbok din nila ang pinagkukutaan pala ng BIFF na itinuturing na ring bandido.

Kung nakayang magkaroon ng malaking SAF contingent na binubuo ng mga pulis upang magsilbi ng warrant of arrest, bakit wala man lang abiso sa sandatahang hukbo ng Pilipinas upang makapagtalaga ito ng air support, sa OIC ng PNP, at lalo na sa kalihim ng DILG na si Mar Roxas? Ano ang hinahabol ng kapulisan sa pagsasariling- kilos? Ayaw nilang makibahagi ng tagumpay, kung sakali, upang masabing sila ay magaling?

Ang sinasabi ay si Purisima daw ang gumawa ng plano at kung nagtagumpay, pambawi daw niya ito sa nasira niyang imahe. At dahil si Purisima ang may plano, dapat alam ng pangulo dahil BFF sila. Nakapagtataka lang dahil kahit suspendido na siya ay kung bakit nakakagawa pa rin ng desisyon. Kung totoo nga ang balita, dagdag sampal na naman ang kapalpakang ito kay Pnoy….na sobra ang pagkabilib kay Purisima. Lumalabas pa na dahil hindi pala alam ni Roxas ang plano, parang binastos siya ng pangulo!…ganoon na ba ka-dispalinghado ang administrasyon ni Pnoy…batbat ng bastusan at kawalan ng tiwala sa isa’t-isa??!!!

Ang isang agam-agam ay baka itimbre lang daw ng MILF ang operation para makatakas ang terorista, dahil mga kamag-anak din nila ang mga miyembro ng BIFF. Sa ganyang agam-agam, malaking problema nga ang usaping pangkapayapaan dahil hindi magkakaroon ng katapusan ang problema na idudulot ng BIFF kahit mapirmahan na ang kasunduan, dahil baka umiral ang ugaling pagsasawalang-balikat.

Dahil malaking poder ang maibibigay sa MILF, na nakapaloob sa usaping pangkapayapaan, hindi kaya gamitin nila (MILF) ito upang makipag-areglo sa MNLF at BIFF upang magkaroon din sila ng malaking bahagi sa pagpapatakbo ng Bangsamoro? Siguradong maraming butas ang kasunduan, tulad ng aspeto sa pagmintina ng hukbong sandatahan, at lalo na sa mga hakbang na gagawin ng Bangsamoro sa pagpapatakbo ng gobyerno nito na ngayon pa lang ay medyo nababanaagan na ng ilang mambabatas.

Magkakamag-anak ang mga miyembro ng MNLF, MILF, at BIFF, kaya hindi maiiwasan ang “pagbibigayan” pansamantala upang matuloy lang ang pagkakasundo sa usaping ng Bangsamoro Basic Law. At, pagkatapos, ano ang garantiya na hindi matatalo ang MILF kung magsanib- puwersa ang MNLF at BIFF upang mag-take over kung sakali? …dapat alalahaning mas matimbang ang dugo kaysa ideyolohiya o pulitika….hindi pa kasama diyan ang Abu Sayyaf na ang pinagmulang ugat ay dating pinagkakatiwalang civilian support group ng sandatahang hukbo ng Pilipinas.

Bilang panghuli, hindi patatalo ang MNLF na pinanggalingan ng MILF, na siya namang pinanggalingan ng BIFF. Kung itinuturing ng MILF na breakaway group nila ang BIFF, sila naman ay itinuturing na breakaway group ng MNLF na siyang original Moro group na may pinaglalabang adbokasiyang para sa kapakanan ng mga taga-Mindanao, na sa kasamaang-palad ay hindi naman kinikilala ng lahat ng pilit nitong sinasakop na bayan at lunsod.

Ang Pagsasamantala sa Kapwa

Ang Pagsasamantala sa Kapwa
Ni Apolinario Villalobos

Nagtuturuan kung kanino nagsisimula ang pagsasamantala – kung sa tao bang nagpapaubaya o sa taong nananamantala. May kasabihan kasing kung walang magpapasamantala ay walang magsasamantala. Ang ganitong kasabihan ang tila ba ay ginagamit ng mga tiwali upang makapagsamantala sa kanilang kapwa, dahil para sa kanila ay “ginusto” naman ng napagsamantalahan.

Kung mamimilosopo sa pananaw na ito, maaaring sabihin na bahala na ang karma sa namantala, at bahala na rin ang Diyos sa napagsamantalahan. At kung nagkaalmahan, dahil hindi nakatiis ang napagsamantalahan, gulo ang resulta – giyera, patayan. May mga taong ayaw maging santo kaya umaalma kung kailangang kalusin na ang abuso ng kapwa.

Maraming anyo ang pananamantala. Isa na dito ang kagutuman dahil ang biyayang dapat ay naibahagi sa lahat ay kinamkam ng iilan kaya ang hindi nakakuha ng bahagi ay pagnganga sa kawalan ang inabot. Hindi dahilan ang kawalan ng pinag-aralan ng iba upang sila ay pagsamantalahan. Kung hindi ninakaw ng mga tiwali sa pamahalaan ang dapat sana ay bahagi ng iba, nagkaroon sana ng maayos na mga programa para sa kanila.

Pagsasamantala rin ang hindi pagtupad sa tungkulin bilang pangkaraniwang mamamayan, empleyado sa pribadong kumpanya o gobyerno, lalo na ang mga opisyal. Pagsira ng tiwala sa kanila ng mga taong dapat ay kanilang sinisilbihan ng maayos ang uri ng kanilang pananamantala. Ito ang malaking isyu sa Pilipinas dahil sa talamak na nakawan sa kaban ng bayan at panloloko ng mga opisyal na nagpapatupad ng mga proyekto. Sa pribadong sektor naman ay talamak ang pananamantala ng mga negosyante sa maya’t maya ay pagtaas ng presyo ng kanilang mga kalakal. Pananamantala naman ang ginagawa ng mga empleyado sa mga madalas nilang pagliban o pagpasok ng late sa trabaho dahil sa hang-over o dahil tinatamad lang.

Sa usaping ispiritwal naman, pinagsasamantalahan natin ang kabaitan ng Diyos sa paulit-ulit na paggawa ng kasalanan, dahil naitanim sa isip na mag-confess lamang sa pari ay pwede na uling manamantala, o di kaya ay maglakad ng paluhod mula sa pinto ng simbahan hanggang altar, o di kaya ay magpakita sa iba na animo ay taimtim na nagrorosaryo, o di kaya ay “magtapon” ng pera sa lata ng pulubi o magbigay ng halos ay panis nang pagkain sa namamalimos ay “mabait” na. Sa ginagawang ito, ay tahasang niloloko ang Diyos na akala ng iba ay bulag. Walang patawad ang tao sa ginagawang pananamantala…pati Diyos ay walang takot na pinapatos!

Denise Michaela….para kay Denise Michaela Balili-Roa

Denise Michaela
(para kay Denise Michaela Balili-Roa)
Ni Apolinario Villalobos

Siya’y isang munting anghel
na sa amin ay ipinagkaloob ng Panginoon,
Naging ilaw namin
na hinintay sa tagal na panahon,
Gabay namin sa pagsuong
sa daluyong na di maiwasan,
At pag-asa na sa amin ay nagtutulak
patungo sa magandang kinabukasan.

Sa buhay namin
siya ay isang kayamanan,
Na ga-bundok mang ginto
ay di kayang tumbasan,
Pumapawi ng paminsan-minsan
naming kalungkutan,
At may ngiting nagpapaliwanag
ng makulimlim na kalangitan.

Tahimik kung minsan
wari’y may iniisip na di malirip
sa murang gulang
nakakatuwa siyang pagmasdan,
Sa mga gawi niyang mistulang
matandang malalim ang iniisip,
Siya ang bundle of joy
na sa aming dugo’y
buhay na dumadaloy!

Ang Pagka-OA ni Dinky Soliman Nang Dumating si papa Francis

Ang Pagka-OA ni Dinky Soliman
Nang Dumating si papa Francis
Ni Apolinario Villalobos

Hindi lang OA o over-acting kundi sobra-sobra pa, ang ginawa ni Dinky Soliman sa paghakot ng mga taong nakatira sa bangketang dadaanan ng santo papa, para itago sa isang mamahaling resort sa Batangas. Kung ginawa niya ito na walang basbas ng Malakanyang, lumalabas na sipsip siya. Kung may basbas naman, ibig sabihin talagang confirmed na walang binatbat kung gumawa sila ng desisyon.

Hindi man lang nila naisip na ang santo papa ay high-tech, nakatutok sa internet dahil gumagamit ng social sites nito tulad ng twitter. Ibig sabihin, nagba-browse ang santo papa sa internet kaya nakikita nito ang mga iskwater at mga nakatira sa mga bangketa, ang mga batang namamalimos sa kalye, ang mga ga-bundok na mga basura, at iba pa – lahat yan ay naka-post sa internet. Bago pa lang siyang pumunta sa Pilipinas ay alam na nito ang tunay ng larawan ng bansa…kaya hindi na kailangang itago pa ang mga taong bangketa at ibang umaalingasaw na kabulukan ng bansa.

Dapat kasi nagbitaw na itong si Dinky Soliman noon pa man dahil sabi ng maraming Pilipino ay wala namang alam sa pagpatakbo ng ahensiya. At dahil nakadikit siyang parang pagkit sa gobyerno kahit papalit-palit ang administrasyon ay magaling daw itong sumipsip! Ganyan ang linta, na dahil sa tindi ng pagsipsip ng dugo ay halos hindi matanggal sa pagkakadikit sa balat.

Malakas ang alingasaw ng pagduda na pinagkitaan ang paghakot ng mga taong bangketa sa isang resort sa Batangas. Dapat itong imbestigahan.

Ang Pagka-OA ni Dinky Soliman Nang Dumating si papa Francis

Ang Pagka-OA ni Dinky Soliman
Nang Dumating si papa Francis
Ni Apolinario Villalobos

Hindi lang OA o over-acting kundi sobra-sobra pa, ang ginawa ni Dinky Soliman sa paghakot ng mga taong nakatira sa bangketang dadaanan ng santo papa, para itago sa isang mamahaling resort sa Batangas. Kung ginawa niya ito na walang basbas ng Malakanyang, lumalabas na sipsip siya. Kung may basbas naman, ibig sabihin talagang confirmed na walang binatbat kung gumawa sila ng desisyon.

Hindi man lang nila naisip na ang santo papa ay high-tech, nakatutok sa internet dahil gumagamit ng social sites nito tulad ng twitter. Ibig sabihin, nagba-browse ang santo papa sa internet kaya nakikita nito ang mga iskwater at mga nakatira sa mga bangketa, ang mga batang namamalimos sa kalye, ang mga ga-bundok na mga basura, at iba pa – lahat yan ay naka-post sa internet. Bago pa lang siyang pumunta sa Pilipinas ay alam na nito ang tunay ng larawan ng bansa…kaya hindi na kailangang itago pa ang mga taong bangketa at ibang umaalingasaw na kabulukan ng bansa.

Dapat kasi nagbitaw na itong si Dinky Soliman noon pa man dahil sabi ng maraming Pilipino ay wala namang alam sa pagpatakbo ng ahensiya. At dahil nakadikit siyang parang pagkit sa gobyerno kahit papalit-palit ang administrasyon ay magaling daw itong sumipsip! Ganyan ang linta, na dahil sa tindi ng pagsipsip ng dugo ay halos hindi matanggal sa pagkakadikit sa balat.

Malakas ang alingasaw ng pagduda na pinagkitaan ang paghakot ng mga taong bangketa sa isang resort sa Batangas. Dapat itong imbestigahan.