Ang Mga Maling Akala ni Binay

Ang Mga Maling Akala ni Binay
Ni Apolinario Villalobos

Ang akala ni Binay, dahil sa pinipilit niyang imahe na siya ay mahirap at maka-mahirap, patok na siya sa taong bayan. Nagbandera pa ng mga retrato sa mga pahayagan – puro front page, kaya may nakahalata na parang paid advertisement. Maka-tribu din daw siya kaya todo costume din at nagpakodak kasama ang mga miyembro ng isang tribu sa Mindanao. Paanong hindi siya asikasuhin ng mga taong nilapitan niya, eh namigay daw ng mga dokumento tungkol sa mga kaek-ekang “pabahay”, na dapat lang naman niyang gawin dahil trabaho niya. Ginamit pa ang puwesto niya at pera ng bayan, na hindi naman nakatulong sa pagkubli ng tunay iyang layunin na pangangampanya lang pala! Sana mag-resign na lang siya bilang Bise-Presidente at cabinet secretary, upang makapag-concentrate sa kanyang kampanya, at nang lahat ng isla ng Pilipinas ay masuyod niya.

Nagpakodak pa kasama ang mga bata na nagbo-boodle fight- kainang nakakamay sa dahon ng saging. Pati mga bata ay sinangkalan pa sa kanyang maitim na hangarin! Sana sinamahan niya ng cake ang mga nakalatag na pagkain, upang lalong mabuo ang kanyang drama. Naglagay din sana siya ng flower arrangement sa gitna ng hapag kainan, gamit ang mga rare orchids ng kanyang asawa na inaalagaan sa asyenda nila sa Rosario, Batangas. At upang lalong masaya, hiniram sana niya ang mga mamahaling ibong alaga ng anak niyang si Abigail upang magamit na palamuti sa paligid ng kainan.

Ang isang wild suggestion ay bumalik siya sa Mindanao, at pasyalan si mayor Rod Duterte, makipagkamay dito tulad ng ginawa ng isang dating presidente na pilit na nagmamalinis, at habang nandoon siya, dumaan na rin siya kay Quiboloy tulad ng ginawa noon ni Gloria Arroyo. Pwede rin siyang dumiretso sa Makilala, na hindi kalayuan at tahakin ang isang landas patungo sa New Israel, sa paanan ng Mt. Apo – doon maraming unggoy…at, siyempre, mga miyembro ng isang nakakabilib na sekta, lahat din lang ng paraan ay ginagawa niya upang magkaroon ng media mileage. At mula sa Makilala, ay mag-side trip siya sa kampo ng MILF.

Magdala siya ng sangkaterbang tagakodak niya at umupa ng eroplano ng PAL o Cebu Pacific…gumastos din lang siya ng pera ng bayan, lubus-lubusin na niya. Pero sa isang banda, kaya ng sarili niyang yaman ang mga gastusin, dahil nakaya nga niyang ibili ng bahay na may elevator ang kanyang anak na kapangalan niya, kaya may adhikain ding kapareho niya. Kapag ginawa niya ang mga suggestion, papatok siya sa mga diyaryo, TV, at radyo…bilang isang trying hard na trapo na pang-Guinnes Book of World Records ang effort!

Maglaan din siya ng isang magdamag na ititiyempo sa prayer rally ng El Shaddai sa Paraῆaque, sabayan niya sa pagkanta si Velarde sa stage. Maghanda siya ng payong na ititihaya upang makasalo ng grasyang awa na hihikayatin niyang bumagsak sa pamamagitan ng pagwagayway ng puting panyo – tumingala siya. Huwag niyang kalimutan ang Iglesia ni Kristo at ang bagong Obispo ng Maynila, upang hindi sila magtampo sa kanya.

Dapat ang isuot niya sa mga lakad na nabanggit ay damit na galing sa ukay-ukay, dahil ang palagi naman niyang sinasabi ay mahirap siya, kaya siya maka-mahirap…at ang mga kalaban niya ay mga mayayaman. Dapat isama niya sa kanyang mga talumpating gasgas, na dahil sa kahirapan ay nabanat siya sa trabaho at kumapal ang kanyang mga palad kaya nagkaroon siya ng kakayahang humawak ng limpak- limpak na salapi, at ang mukha naman niya ay kumapal sa sobrang pagkabilad sa init ng araw dahil sa kaiikot niya sa ekta-ektaryang lupaing hindi naman kanya, kaya lalo siyang umitim. At huwag sana niyang kalimutan ang mga Mangyan sa Mindoro at mga tribu sa norte kung saan ay makakatipid siya ng malaki dahil ang isusuot niya kung magpapakodak ay bahag lang!

Sa mga lakad niyang yon, sana hindi umulan…para walang kidlat na magngangalit at maghahanap ng tutusuking sinungaling na taga-lupa!

Dapat isipin ni Binay na matatalino na ang mga botante ngayon. Pati ang ilang pari ay nagpapayo na tanggapin ang mga perang suhol ng mga garapal na mga kandidato pagdating ng kampanyahan subali’t bumoto nang naaayon sa kanilang konsiyensiya, dahil talagang hindi mapigilan ang bilihan ng boto…at ang perang binibigay sa kanila ay pera din naman ng bayan, kaya bawi-bawi lang.

Ang Ka-epalan ng Mga Mambabatas

Ang Ka-epalan ng Mga Mambabatas
ni Apolinario Villalobos

Ang ibig sabihin ng “umeepal” ay nagyayabang, nagpapasikat, pumuporma, nagpapa-istaring, at iba pang gawaing may kinalaman sa katakawan ng atensiyon. Ganyan ang ugali ng mga mambabatas ng Pilipinas, naghihintay ng magandang pagkakataon upang maka-epal sa pagpatawag ng mga imbestigasyon na gagamiting batayan daw sa paggawa ng batas. Hindi naman sila bulag upang hindi makita ang mga bagay o mga araw-araw na pangyayari upang magamit ang mga ito bilang batayan sa paggawa ng mga batas. Ang mga hinihintay nila ay ang “pagputok” o “pagsabog” ng eskandalo na humahatak ng atensyon ng taong bayan. Kung walang eskandalo kasi, walang mga report sa diyaryo, TV at radyo, kaya walang “media mileage”.

Tulad na lang halimbawa ng nakaambang pagputok ng bulkang Mayon. Nagkukumahog ang mga epal na mga kongresista sa pagpunta sa Albay upang mangalap ng mga pagbabatayan para sa “imbestigasyon” ng sitwasyon, at pati ang mga Phivolcs na maayos ang trabaho, dinadamay. Noon pa man, alam na ng lahat na wala talagang instrumentong makakabasa ng mga mangyayari na may kinalaman sa pagputok ng bulkan. Sa kabila ng ganitong katotohanan, para sa mga kongresista, hindi maganda ang pabagu-bagong pahayag ng Phivolcs, kaya dapat silang imbestigahan! Saan napunta ang katinuan ng mga kongresista? Bakit hindi na lang sila maghintay ng mga pahayag na katulad ng ginagawa ng iba pang Pilipino?

Kung ang gusto ng mga mambabatas ay magkaroon ng batas upang hindi na tirahan ang mga lugar na nakapaligid sa aktibong bulkan, maaari naman nilang gawin ito sa “tahimik” na paraan na bahagi ng kanilang responsibilidad, at sa Kongreso na nila pag-usapan, sa halip na mambulabog at manggulo sa Albay. Nagpakodak lang yata sila sa Albay upang may magamit sa press-release nila!

Sa isang banda, ang problema na dulot ng pagsisikip sa piyer dahil sa mga walang lamang container hanggang ngayon ay hindi nareresolba sa kabila ng mga impormasyong galing mismo sa mga negosyante na may kinalaman dito, subali’t hindi kinikibo ng mga mambabatas. Takot ba sila na makalkal ang eskandalo tungkol sa “maperang” kalakaran na bistado ng ultimong mga kargador? Anong batas ang ginawa nila tungkol dito?

Ang Bureau of Customs, alam na din ng buong bayan na lumulutang sa korapsyon…hanggang ngayon ay hindi pa rin nalilinis. Mismong ang bagong komisyoner ang umamin na talagag batbat ng korapsyo ang kagawaran, subali’t ang mga taong alam namang sangkot sa mga anomalya, ay hindi tinatanggal. Ang mga batas para sa kagawaran ay animo mga band-air lamang na tinatapal tuwing may anomalya…wala pang ngipin kaya sa katagalan ay binabalewala. Sa kainitan ng mga smuggling nagkaroon ng imbestigasyon, pero hanggang doon na lang. Hanggang ngayon ang mga batas na magpapabago sa imahe ng nasabing ahensiya ay pinapangarap pa lamang.

Ang Department of Social Welfare and Development (DSWD), na butas-butas ang imahe dahil sa sunud-sunod na anomalya, ay pinamumunuan pa rin ni Dinky Soliman na noon pa man ay hiniling nang tanggalin dahil wala namang binatbat sa pamumuno, subali’t hanggang ngayon ay nakakapit pa rin sa pwesto na parang tuko. Walang batas na ginawa na dapat ay batayan sa maayos na pangangalaga ng mga donasyon, at puro imbestigasyong wala namang kinahihinatnan ang ginagawa.

Ilan lamang ang mga nabanggit na kaepalan ng mga mambabatas. Ang mga kaepalan nila ay kabilang sa mga sakit na unti-unting nagpapaagnas sa bansa. Kaya dahil dito, walang katapusan ang pagdurusa ng taong bayan….

Ang Debateng Binay-Trillanes

Ang Debateng Binay-Trillanes
Ni Apolinario Villalobos

Kung matutuloy sa November 10 ang pagtatalo sa pagitan ni Binay at Trillanes, marami ang dapat asahan, tulad ng:

1. Pagpupumilit pa rin ni Binay na pinupulitika lamang siya, hindi siya nagnakaw sa Makati noong nanunungkulan siya bilang mayor, hindi nila pagmamay-ari ang asyenda sa Rosario, Batangas, at ang kanyang pamilya na ang hangad ay magsilbi sa taong bayan kaya inosente sila hangga’t hindi napapatunayan sa hukuman.
2. Mawawala sa porma si Trillanes kapag napikon, uulitin lamang niya ang mga bintang na nasabi na sa mga pagdinig sa senado, isa na ang mabigat na pagkaroon ni Binay ng mga dummy na pansamantalang umaako ng mga pag-aari nila, at hindi siya masasapawan ni Binay kahit abogado pa ito dahil ang hahanapin ng mga tao ay ang laman ng kanilang mga sasabihin, at hindi mga teknikalidad sa isang pormal na debate.

Kahit ipagpipilitin ni Binay ang kanyang pagmamalinis sa araw ng debate, mahihirapan siya dahil mabibigat ang mga ebidensiyang nailatag na, at siyang ikalulusaw ng kanyang pagkakataong manalo sa eleksiyon 2016. Kung iisa-isahin niya ang mga isyu na binibintang sa kanya at tatapatan niya ng mga paliwanag, malamang mahihirapan siyang makumbinse ang taong bayan, dahil simula pa lang nang unang araw na pumutok ang eskandalo, malayo na ang inabot ng pag-analisa nila batay sa mga ebidensiya na mahirap pabulaanan. May mga ideya na ang taong bayan kung paanong napatungan ng kung ilang daang porsiyento ang halaga sa pagpagawa ng Makati City Hall II, pati na ang mga gamit sa Ospital ng Makati, at ang mga cake na binibigay sa mga senior citizen. Pati na rin ang paraan kung paanong napapasakamay nila ang mga nakurakot na pera na nakalagay sa mga bag.

Tungkol naman sa asyenda sa Rosario, Batangas, kahit manikluhod pa si Binay sa harap ng kamera sa araw ng debate upang madiin ang pagdi-deny, wala na rin itong epekto, dahil mismong mga dating may-ari ang nagpapatunay ng bentahan- mga matatanda na hindi aasahang magsinungaling. Pati ang naunsiyaming pagpresenta ni Tiu ng sarili niya bilang may-ari ng asyenda, hindi na rin maisasalba ni Binay kahit pa sabayan niya ito ng hagulhol. Naipaliwanag na ni Cayetano kung paanong naitatago ng mga tiwaling opisyal ng bayan ang kanilang mga nakaw na yaman upang walang makitang ebidensiya, na malinaw na naipakitang ginawa ng mga Binay, kaya anumang paliwanag ni Binay sa araw ng debate ay wala na ring saysay.

Kung ang debate ay style na walang rebuttal, kundi paglalahad lamang ng bawa’t panig subalit may ipapataw na taning o limitadong oras, talung-talo na si Binay, dahil taong bayan ang huhusga kung sino ang mananalo. At dahil siya ang panig na nagdedepensa, dapat maunang magsalita si Trillanes na siyang nag-aakusa. Dapat pabulaanan ni Binay punto por punto ang mga sasabihin nito, subalit alam naman ng taong bayan na talagang wala siyang maisasagot na katanggap-tanggap. Kung meron kasi, dapat yon na ang sinasabi niya sa mga interbyu, o di kaya ay umaper man lang sa senado upang sagutin ang mga katanungan. Subalit ang palagi niyang sinasabi ay pinupulitika lamang siya.

Sa kabuuhan nito, ang debate ay gagamitin lamang upang madiin ang pagsisinungaling ni Binay, kaya tama ang sinabi ng isa niyang kaalyado sa partido na ito ay isang patibong upang lalong maipakita sa taong bayan na walang karapatan si Binay na maging Presidente ng Pilipinas.