Ang Pagtitiyaga…para kay Glace Lapuz Fernandez

Ang Pagtitiyaga

(para kay Glace Lapuz Fernandez)

Ni Apolinario Villalobos

 

Lahat ng tao ay gusto ang maginhawang buhay

At hangga’t maaari, ito sana ay walang kapantay

Nang sa tuwing umagang paggising, may aliwalas

‘Di lang sa paligid, pati sa mukha rin ay nababakas.

 

Kung walang tiyaga walang nilaga, ito’y kasabihan

Di pinapansin lalo na ng ilang pinaiiral ay katamaran

Subali’t kung sino ang mga may ganitong pag-uugali

Siya pang maingay sa pagreklamo at magaling manisi.

 

Hindi lahat ng bagay ay nakukuha ng ganoong kadali

Dapat pagtiyagaa’t paghirapan, ano mang mangyari

Kung sa paglikha ng Diyos, anim na araw ang ginugol

Pagpapakitang dapat sa lahat, tiyaga lang ang nauukol.

 

Lahat ng ating ginagawa, dapat may kaakibat na tiyaga

Hindi maaaring magmadali dahil masakit ang madapa

Ang pagtitiyaga ay nangangahulugan din ng pag-iingat

Upang ang buhay natin ay maayos, na siya lang dapat!