Ang Magagawa ng Gobyerno at Mga Mambabatas…suhestiyon lang naman

Ang Magagawa ng Gobyerno

at Mga Mambabatas….suhestiyon lang naman

Ni Apolinario Villalobos

 

Para sa isang third world na bansa tulad ng Pilipinas, ang hinahangad lamang ng mga mamamayan ay magkaroon ng maayos na trabaho, sapat na sweldo, mga presyo na abot-kaya, malinis at mapayapang kapaligiran. Ang pamahalaan naman, hindi na dapat mag-isip ng mga kung anu-anong hindi makatotohanang adhikain at proyekto upang umangat ang antas ng kalidad ng buhay-Pilipino. Sa ganang ito, ang mga sumusunod ay suhestiyon lamang:

 

  1. Ibalik sa pangangalaga ng pamahalaan ang pamamahala ng langis at mga produkto nito dahil napatunayan nang hindi maganda ang kinahinatnan ang deregulation.
  2. Ibalik sa pangangalaga ng pamahalaan ang pangangasiwa ng pailaw at patubig dahil nadanasan ang hirap nang isa-pribado ang mga ito.
  3. Kumuha ng mga talagang “managers” na may angkolp na kaalaman sa pagpapatakbo ng mga ahensiya at hindi mga taong pinagkakautangan ng loob nang nakaraang eleksiyon. Dapat ituring ang buong bansa na isang malaking “kumpanya” na ang nagpapatakbo ay isang bihasang “manager” – ang Presidente. Sa ganitong paraan, magkakaroon ng propesyonalismo sa bawat tungkulin.
  4. Ayusin at i-update ang mga operating manuals ng lahat ng mga ahensiya para malaman ng mga kawani kung ano ang dapat nilang gawin sa lahat ng pagkakataon at sitwasyon. Napansin na kung kaylan may problema ay saka pa lamang naghahagilap ng mga memo o dokumentong pagbabasehan ng mga karampatang aksyon at solusyon
  5. Gumawa ng isang mega-operating manual na ang mga sentro ay Malakanyang, Hudikatura, Kongreso, at Senado. Sa ganitong paraan ay hindi magtuturuan kung sino ang nagkamali at kung saan ang pagkakamali. Kalimitan, walang maayos na koordinasyon ang apat na itinuturing na mga haligi ng bayan.
  6. Damihan ang mga barko at helikopter ng Philippine Navy na dapat ay naka-deploy sa mga major na daungan ng bansa upang mapabilis ang pagresponde sa mga pangangailangan lalo na sa panahon ng kalamidad. Nakita ang kakulangang ito ng Pilipinas noong hagupitin ng bagyong Yolanda ang Leyte at Samar, dahil dalawang araw na ang nakalipas pagkatapos humagupit ang bagyo ay wala pa ring dumating na tulong sa mga tao. Dapat alalahanin na ang Pilipinas ay isang bansa na binubuo ng mga isla. Hindi kailangan ang mga eroplanong pandigma kung ito ang binabalak ng gobyerno upang mapangalagaan ang karapatan ng Pilipinas sa mga islang pinag-aagawan sa West Philippine Sea, dahil wala ring magagawa ang mga ito sa mga dambuhalang gamit ng Tsina.
  7. Bigyan ng insentibo sa pamamagitan ng subsediya at tulong teknikal ang mga Pilipinong imbentor. Pangunahan din ng gobyerno ang pagbili ng mga imbensyon nila. Magtalaga ng isang permanente at malaking showroom ng mga imbensyong Pilipino na madaling puntahan ng mga mamamayan, lalo na ng mga neyosyante.
  8. Palabasin mula sa mga aircon na opisina nila ang mga Municipal at City Administrators upang personal na mag-check ng kalagayan ng kanilang nasasakupan, upang hindi lang umasa sa mga dinadayang report ng mga field workers. Hindi isinasama sa mga report ang mga palpak na contracted projects na hindi maayos ang pagkakagawa lalo na ang mga drainage at kalsada. Hindi rin isinasama sa mga report ang mga manhole na ginawang basurahan. Isama pa rito ang mga establesimento na nagpapabaha ng mga bangketa kung maglinis sila ng pwesto, kaya may mga taong nadidisgrasya dahil sa pagkadulas, at mga tulay na ginawang palikuran. Mga maliliit na bagay ito kung ituring subali’t kapag pumutok ay yumayanig sa kredibilidad ng pamunuan ng mga lokal na pamahalaan.
  9. Gawin sa paraang incognito o hindi halata ang pag-iinspeksyon ng mga palengke upang mahuli ang mga nandadayang negosyante pagdating sa presyuhan.
  10. Bilhin ang mga matitibay na mga pasilidad na pang-ilaw sa mga kalsada, tulay at iba pang nakatiwangwang na mga lugar, hindi yong makukulay at magaganda nga ay plastic naman kaya, isang bagyo lang ang dumaan ay warat na.
  11. Magkaroon ng batas na magbabawal sa mga lokal na pamahalaan sa wala nilang patumanggang pagpalit ng mga simbolo at kulay sa mga bayan o lunsod, ayon sa kagustuhan ng bagong nanalong mayor, na nagiging dahilan ng pagkalito ng mga tao.
  12. Palakasin ang mga ahensiya na may kinalaman sa pagpapalago ng small at medium businesses, at pagsasaka, upang mapatatag ang pundasyon ng mga ito na siyang magsusustina sa mga Pilipino sakaling hindi na bagsakan ang bansa ng mga produktong galing Tsina, sakaling lumala ang alitan dahil sa pinag-aagawang mga isla.
  13. Magpasa ng batas upang ang mga Pilipinong maski 50 taong gulang na o mas higit, pero malakas pa, ay mabigyan ng pagkakataong magtrabaho. May mga ahensiya ng gobyerno na nagbibigay ng pagkakataon sa mga senior citizens upang magtrabaho tulad ng MMDA, pero hindi ito sapat.
  14. Ibalik ang dating sistema sa edukasyon na paggamit ng mga libro sa tradisyonal nitong ayos, at hindi pormang workbook, upang magamit pa ng iba. Ang pormang workbook ay may mga tanong- pagsusulit kada tsapter kaya hindi na nagagamit ng iba.
  15. Magtayo ng mga paaralan sa mga liblib na lugar ng Pilipinas, at palakihan ang mga nakatayo na upang madagdagan ang mga kwarto. Lagyan din sila ng maayos na mga palikuran.
  16. Ayusin ang mga sirang parola o lighthouse sa mga isla at maglagay sa mga baybabayin na wala nito upang matulungan ang mga maglalayag, lalo na ang mga mangingisda.
  17. Magtayo ng mga istruktura para magamit na palengke o talipapa sa mga liblib na bayan o malalaking baryo.
  18. Seryusuhin ang pag-aaral tungkol sa isyu ng basura.
  19. Magkaroon ng makatotohanang gamutan sa mga barangay. May mga nurse nga, wala namang stock na mga gamot.
  20. Rebisahin ang kabuluhan ng mga ahensiya upang malaman kung alin ang mga inutil at walang silbi upang hindi na kumain pa ng budget mula sa kaban ng bayan.

 

Kung ang mga mambabatas at ang pamahalaan ay kumikilos ayon sa inaasahan ng mga taong bayan, wala sanang nangyayaring pagmamartsa sa kalye ng mga taong sumisigaw at nambabato ng paninisi sa kanila. Wala nang naniniwala sa mga report ng maski anong international na grupong bihasa daw sa estatistika dahil ang pinagbabatayan nila ng kanilang report ay mga dinayang report ng mga ahensiya upang mapagtakpan ang mga kakulangan ng pamahalaan. Ang kailangan ng bansa ngayon ay totoong mga lider at mga mambabatas na hindi inakala ng mga botante nila na magiging kurakot at mahihina pala pagdating sa paggawa ng makatotohanang desisyon.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s