Mga Latak ng Lipunan
Ni Apolinario Villalobos
Nakikita natin silang palabuy-laboy sa paligid
Ang iba ay halos hubad, mukha’y nanlilimahid
Merong mga paslit, merong halos ay hilahod
Iba ay sa tabi nakasalampak, gutom at pagod.
Iba sa kanila, mapalad dahil sa pansing ibinigay
Naabutan ng baryang makislap, o isang tinapay
Meron namang kahi’t anong pilit na pagsumamo
Ang kinalabit ay matigas, parang estatwang bato.
Kung unawain, maraming dahilan, ba’t sila ganyan
May pumili ng kawalan ng ambisyon at katamaran
Marami ring naging biktima ng masamang tadhana
Bagay na ‘di man nais, sa kanila’y nagsadlak sa dusa.
Mga latak ng lipunan kung ituring ng iba…’di dapat
Sila’y mga tao rin, at kung damdamin, merong sapat
Maraming hindi gusto, itong sa kanila ay nangyayari
Kaya nagpipilit makabangon, nagpipilit na magpursigi.
Sa may maalwang buhay na idinulot ng mga tagumpay
Huwag sanang libakin, mga taong animo walang saysay
Huwag sanang duraan at lalong huwag silang pandirihan
Nilalang din sila ng Diyos, at sa buhay ay may karapatan!
penpowersong 